Temekiniń saldarynan mert bolatyndar juqpaly aýrýlardyń saldarynan kóz jumatyndardan áldeqaıda kóp- dóńgelek ústel otyrysy
ASTANA. Mamyrdyń 13-i. QazAqparat /Aıdar Ospanalıev/ - Temeki memleket úshin tek shyǵyn. Sebebi onymen kúresý úshin memleket densaýlyq saqtaý men áleýmettik qamtamasyz etý baǵytyndaǵy jumystarǵa qyrýar qarjy bóledi. Onyń ústine temeki eńbek ónimdiligin kemitip,
qorshaǵan ortany lastaıdy. Azyq-túlik ósirilýi tıis kóptegen jerler temeki ósirýge paıdalanylady. Al temeki shegý barysyndaǵy salaqtyq azamattardyń ómirlerine orny tolmas shyǵyn ákeledi. Sondyqtan da temeki shegý jáne ony óndirý ekonomıkalyq jaǵynan múldem tıimsiz sala. Bul týraly búgin Parlament Májilisinde «Qazaqstan zańnamasyn Dúnıejúzilik densaýlyq saqtaý uıymynyń temekige qarsy kúres jónindegi negizdemelik konventsııasyna úılestirý» atty taqyrypta ótken dóńgelek ústel otyrysynda Densaýlyq saqtaý mınıstrligi Salaýatty ómir saltyn qalyptastyrý ulttyq ortalyǵynyń Bas dırektory Sáýle Dıqanbaeva málim etti, dep habarlaıdy QazAqparat.
Onyń málimetterine qaraǵanda, temeki jylyna álem boıynsha 5 mıllıonnan astam adamnyń ómirin qııady. Temeki shegý búginde qaýipti degen juqpaly aýrýlardyń ózinen qaterli bolyp otyr. Onyń saldarynan mert bolatyn azamattar sany Adamnyń qorǵanys tapshylyǵynyń qozdyrǵyshy, Juqtyrylǵan qorǵanys tapshylyǵynyń belgisi men qurt aýrýy sııaqty derterden kóz jumatyn azamattardan kóp.
Búkilálemdik densaýlyq saqtaý uıymynyń málimetterine qaraǵanda, shamamen alǵanda 500 mıllıon adam temekiniń saldarynan mert bolady. Al aldaǵy 25 jylda bul kórsetkish 3 esege artady jáne ol birinshi kezekte Azııa men Qytaıdy qamtıdy.
