Temekini sóreden múldem alyp tastaý josparlanǵan
ASTANA. QazAqparat - Bolashaqta dúken sórelerinen temeki ónimderin múldem alyp tastaýy múmkin. Zertteýge sáıkes, adam ondaı ónimderdi kórmese, temeki shegýge degen yntasy azaıady, dep xabarlaıdy QazAqparat tilshisi.
Temekige qarsy koalıtsııanyń múshesi Jámılıa Sadyqovanyń aıtýynsha, búginde temeki ónimderin sórege shyǵarýǵa tyıym salý týraly usynys bar. Ondaıda temekini múldem alyp tastaıdy, ıa bolmasa, perdemen jaýyp qoıady. "Máselen, qazir dúken kassasyna kelgende joǵary jaqta temekiniń túr-túri ilinip turady. Jańaǵy shara zańdy túrde engizilse, barlyq temeki ónimderi perdemen jabylady. Sebebi adam temekini kórgende shegýge degen yntasy artady. Reseı atalǵan sharany engizdi. Ol jaqta barlyq temekini perdemen jaýyp otyrady. Satyp alýshyǵa temekiniń tizimi beriledi. Sol jerde baǵasy da, markasy da jazylady. Osylaısha, tańdaý quqyǵy beriledi. Bizde osy ispetti sharany qoldaný úshin qazirgi zańnamaǵa túzetýler engizý kerek. Kóremiz, jyldyń sońyna deıin densaýlyq saqtaý mınıstrligi temeki ónimderin jaýyp otyrýǵa qatysty ózgeristerdi daıyndap shyǵarýy tıis. Odan keıin Parlament bar", - dedi J.Sadyqova QazAqparat tilshisine bergen suxbatynda.
Onyń sózine qaraǵanda, búginde temekimen kúres salasyndaǵy eń tıimdi shara ol - aktsızderdi kóterý. Sonyń arqasynda temekini tutyný kólemin 50 protsentke azaıtýǵa bolady. "Odan keıin qoǵamdyq jerlerde temeki shegýge tyıym salý sharasy keledi. Sosyn qoraptarǵa qorqynyshty sýretterdi ornalastyrý bar. Al temeki ónimderin sóreden alyp tastaý, jańaǵy perdelerdi qoldaný - bunyń barlyǵy qosymsha sharalar", - dep atap kórsetti J.Sadyqova.
