Temekimen kúres kásipkerlikke jasalatyn reıdter emes - ІІD
ASTANA. Sáýirdiń 14-i. QazAqparat /Arman Asqarov/ - Búgingi tańda elordadaǵy qoǵamdyq oryndarda júrgizilip jatqan temekimen kúres is-sharalary kásipkerlikke jasalǵan reıdtik tekserister dep sanaýǵa bolmaıdy.
Búgin Astanada ótken baspasóz máslıhatynda Іshki ister departamentiniń Qoǵamdyq qaýipsizdik basqarmasynyń bólim bastyǵy Quralaı Qarına osylaı aıtty, dep habarlaıdy QazAqparat.
Onyń sózine qaraǵanda, búgingi tańda Іshki ister organ qyzmetkerleri men eriktilerden jasaqtalǵan arnaıy ıkemdi toptardyń jumysy kásipkerlik nysandarǵa júrgizilip jatqan reıdtik tekserister dep baǵalanyp otyr. «Ol durys emes. Astanada júrgizilip jatqan temekimen kúres kásipkerlikke jasalatyn reıdter emes. Zań boıynsha ishki ister organdary tek aldyn alý is-sharalaryn júrgizýde. Bul jumys jańa Densaýlyq kodeksinde qarastyrylǵan. Sondyqtan biz zań aıasynda qyzmet etýdemiz», - deıdi Q.Qarına.
Bólim bastyǵy atap kórsetkendeı, jyl basynan beri Astanadaǵy qoǵamdyq oryndarda temekini zańsyz shegý oqıǵalarynyń aldyn alýǵa baǵyttalǵan 20-ǵa jýyq tekseris júrgizilip, 12 zań buzýshylyqtar anyqtaldy. «Atap óter jáıt, eger oıyn-saýyq ornynda otyrǵan adam temeki shegetin bolsa, zań buzý jónindegi hattama sol adamǵa toltyrylady. Sol jerdiń qyzmetkerleri temeki shekken bolsa, onda qoǵamdyq orynnyń ákimshiligi jaýapqa tartylatyn bolady. Al jumys berýshi, ıaǵnı oıyn-saýyq ornynyń ıesi ǵımaratta temeki shegetin arnaıy bólmeler qarastyrylmaǵan jaǵdaıda zań aldynda jaýap beredi», - deıdi ol.
