Temekige qarsy zańnamany júıeli túrde buzǵan zańdy tulǵalarǵa salynatyn aıyppul kólemi artady
ASTANA. 6 qarasha. QazAqparat - Búgin Іshki ister mınıstrligi «Temeki tútininen bos Qazaqstan úshin» ulttyq koalıtsııanyń zańgerlik organy bolyp tabylatyn «Temekisiz» qoǵamdyq qorymen birlesip, «Qazaqstan Respýblıkasynyń temekige qarsy baqylaý jónindegi zańnamasyn jetildirý» taqyrybynda dóńgelek ústel ótkizdi.
Dóńgelek ústel jumysyna Parlament Májilisiniń depýtattary, «Nur Otan» HDP músheleri, sondaı-aq memlekettik organdardyń, úkimettik emes jáne halyqaralyq uıymdarynyń basshylary qatysty.
Qatysýshylar syndarly dıalog formatynda Ákimshilik quqyq buzýshylyq týraly kodeksiniń normalaryn jetildirý boıynsha usynystardy, temekige qarsy normalardy baqylaý jáne ony oryndaý sharalarynyń praktıkalyq keshenin talqylady.
Atap aıtqanda, talqylaý barysynda zańdy tulǵalar úshin júıeli túrde temekige qarsy zańnamany buzǵany úshin aıyppuldardy kóbeıtý boıynsha usynymdar qabyldandy. Budan bólek, sanıtarlyq jáne órtti qadaǵalaý qyzmetterin qosa otyryp, ákimshilik isterdi qozǵaý boıynsha ókilettikterdi keńeıtetin túzetýler toptamasy da qaraldy. Temeki buıymdaryn jarnamalaýdy joıý, sondaı-aq temeki tartýǵa jaǵdaı jasaǵany jáne temeki tartatyn klıentterge qatysty áreketsizdigi úshin restoratorlardyń jaýapkershiligin qataıtý boıynsha naqty is-sharalar belgilendi.
Qatysýshylar azamattyq jurtshylyqpen, úkimettik emes uıymdarmen, memlekettik organdarmen jáne BAQ-pen ózara is-qımyl jasasqan jaǵdaıda ǵana qazaqstandyqtar úshin temeki tútininsiz tıimdi orta jasaý jáne zańdylyqty saqtaýdy jaqsartý múmkin degen pikirge keldi.
