Temeki tuqylyn tastaǵan qytaılyqtan para alǵan polıtseı sottaldy
AQTÓBE. QazAqparat - Aqtóbedegi áýejaıda tártipti baqylaıtyn kapıtan Aıdos Igımbetov 150 myń teńge para alǵan. Ol qytaılyq azamattyń temeki tartyp, tuqylyn laqtyryp jibergenin kóre tura, ákimshilik is qozǵamaǵan, dep habarlaıdy QazAqparat tilshisi.
Aqtóbedegi №2 qalalyq sotynda búgin polıtsııa qyzmetkerine úkim shyqty. Áriptesteri Aıdos Igımbetovti qoldaýǵa kelgenimen, is dálelin tapty. Ótken jyldyń jeltoqsan aıynda Aqtóbe halyqaralyq áýejaıyndaǵy tártipti baqylaýǵa bekitilgen polıtsııa kapıtany Aıdos Igımbetov Almatydan kelip, áýejaı aldynda temeki tartyp, keıin tuqylyn laqyryp jibergen qytaılyq azamatty ustady. Ákimshilik is qozǵaýy tıis polıtsııa qyzmetkeri bárine kóz jumyp, olardan 150 myń teńge talap etken. Alqashqy kúni suraǵan aqshasynyń 50 myń teńgesin alǵan. Keıin qytaılyq azamattyń ókili taǵy 50 myń teńge jetkizip bergen. Osydan soń Kóliktegi ІІD Aqtóbe stantsııasyndaǵy Іshki ister jelilik basqarmasy, qaýipsizdik qyzmetiniń elektrondy poshtasyna aryz túsirgen. Kólik prokýratýrasynyń prokýrory Baýyrjan Qorjymbaevtyń aıtýynsha, qytaılyq azamattyń ókilinen sońǵy 50 myń teńgeni alǵan kezde polıtsııa qyzmetkeri qolǵa tústi.
Sýdıa Gúlnar Tlepova polıtsııa qyzmetkeri Aıdos Igımbetovti 7 jylǵa bas bostandyǵynan, kapıtan sheninen aıyrýǵa úkim shyǵardy. Sonymen qatar, buǵan deıin kepilmen júrgen sottalýshy sot zalynan qamaýǵa alyndy. Ári qytaılyq azamattyń ókilinen alǵan 150 myń teńgeni keri qaıtarady. 32 jastaǵy polıtsııa qyzmetkeriniń jeke múlki tárkilenedi.
Sot úkimi zańdy kúshine engen joq.
