Temeki tartý sýıtsıd qaýpin arttyrady - zertteý
ASTANA. QazAqparat - Temekiniń densaýlyqqa zııandy ekenin jurttyń bári biledi, biraq temeki tarýdyń sýıtsıdke ushyratý táýekeli úlken ekenin ekiniń biri bile bermeıdi. Nicotine & Tobacco Research jýrnalynda jarııalanǵan zertteý temeki tartý men ózine qol salýdyń arasynda tyǵyz baılanys bar ekenin kórsetti, dep jazady hi-news.ru portaly.
Zertteýshiler 1990 jyldan 2004 jylǵa deıingi aralyqtaǵy temekige qarsy kúshti kúres júrgizip jatqan memleketter men temeki shegýshilerge jumsaqtaý qaraıtyn elderdiń statıstıkasyn salystyrǵan.
Temeki ónimderine aktsız engizip, temeki tartýdy shekteý sharalaryn qolǵa alǵan elderde buǵan onsha mán bermegen elderge qaraǵanda, ózine qol salý jaǵdaılary tómen bolyp shyqqan.
Shekteý sharalaryn engizý ózin ózi óltirý jaǵdaılaryn edáýir azaıtqan. Árbir aktsızdik dollar 10 paıyzdyq tómendeýge qol jetkizedi. Sondaı-aq bul oraıda temekige qarsy sharalardyń róli zor, deıdi zertteýdiń jetekshi avtory, epıdemıolog, Sent-Lýıstegi (AQSh) Vashıngton ýnıversıtetiniń medıtsına mektebinen Rıchard Grýcha.
Temeki ónimderine salyq deńgeıi tómen jáne qoǵamdyq oryndarda temeki tartýǵa tyıym salýǵa jeńil qaraǵan elderde ózine qol salý oqıǵalary 6 paıyzǵa joǵary bolyp shyqqan.
Buǵan deıin temeki tartý men ózine qol salý oqıǵalarynyń arasyndaǵy baılanysty ǵalymdar júıke aýrýlarynyń saldaryna balap kelgen bolatyn. Júıke aýrýlaryna ushyraǵan, alkogoldik jáne esirtkige táýeldi adamdar temekige úıir bolady jáne munyń sońy sýıtsıd jaǵdaılaryna ákep soǵady, dep sanaıdy mamandar. Sondyqtan da bul jaǵdaılar bir birimen baılanysty jáne ol óz kezeginde ózine qol salýǵa ushyratatyny belgili boldy.
