Temeki shekken reseılik boıjetken «Sheremetevo - Nur-Sultan» reısinen túsirildi
NUR-SULTAN. QazAqparat - Kólik polıtseıleri ákimshilik quqyqbuzýshylyqqa jol bergen «Sheremetevo-Nur-Sultan» áýe reısinen Reseı Federatsııasynyń azamatyn túsirip aldy, dep habarlaıdy QazAqparat tilshisi Kóliktik polıtsııa departamentine silteme jasap.
Osy jyldyń 4 maýsymynda Nur-Sultan qalasy polıtsııasynyń jelilik bólimine «Eır Astana» áýe kompanııasy ókilinen habarlama kelip túsken. Kompanııa ókili «Sheremetevo-Nur-Sultan» baǵytyndaǵy reıste quqyqbuzýshynyń bar ekenin habarlaǵan.
Tekserý kezinde kólik polıtseıleri 34 jastaǵy RF azamatshasynyń bortta temeki shekkenin anyqtaǵan. Áýe kemesi komandıriniń qujaty boıynsha álgi áıel atalǵan reısten túsirilgen. Osydan keıin onyń ústinen ákimshilik quqyq buzý jóninde hattama toltyrylyp, 63 125 teńge aıyppul salynǵan.
Departamenttiń ákimshilik zańbuzýshylyqtar jónindegi basqarma bastyǵy Jasulan Baıkenovtyń aıtýynsha, osy jyly kólik polıtseıleri 26 myń adamdy ákimshilik jaýapkershilikke tartqan. Onyń ishinde 1894 adamnyń ústinen temeki shekkeni úshin hattama toltyrylǵan.
«Áýe kemesinde ushý kezinde qaýipsizdik erejeleriniń buzylýy saldarynan qaterli jaǵdaı týyndasa, aıypkerge 200 AEK kóleminde aıyppul salynady. Nemese ol 15 táýlikke qamalady», - deıdi polıtsııa podpolkovnıgi.
Foto: © Flickr/jnd_photography/Be OH be
