Temeki shegýge qarsy sharalardy kúsheıtýge qatysty zań jobasy 20 sáýirde Parlamentke usynylady
ASTANA. 29 naýryz. QazAqparat - Elimizde temeki shegýdiń taralýy 26,5 paıyzdy quraıdy. Bul týraly búgin QR DSM janyndaǵy emdelýshilerdiń quqyn qorǵaý jónindegi qoǵamdyq keńestiń otyrysy barysynda belgili boldy.
«Besinshi Ulttyq áleýmettik saýalnama málimetterine qaraǵanda, respýblıkada turǵyndar arasynda temeki shegýdiń taralýy 26,5 paıyzdy quraıdy. Temeki shegý onkologııalyq, júrek-qan tamyrlary aýrýlary, ınfarkt, ınsýlt, tynys alý joldary aýrýlaryn, gangrena, zaǵıptyq, erte qartaıý, belsizdik, túsik tastaý jáne ózge de ınfektsııalyq emes aýrýlarǵa dýshar etedi. Onkologııalyq dertterden bolatyn ólim-jitim qan aınalymy júıesi aýrýlarynan keıingi ekinshi oryndy alady»,-delingen mınıstrlik málimetterinde.
Aıta keteıik, temeki tutynýdy shekteý jáne aldyn alý maqsatynda, Qazaqstan 2006 jyly ratıfıkatsııalaǵan Dúnıejúzilik densaýlyq saqtaý uıymynyń temekige qarsy kúres konventsııasy sheńberinde QR Densaýlyq saqtaý mınıstrligi temeki shegýge qarsy sharalardy kúsheıtýge qatysty «Halyq densaýlyǵy jáne densaýlyq saqtaý júıesi týraly» QR Kodeksine ózgerister men tolyqtyrýlar engizý týraly zań jobasyna birqatar ózgerister men tolyqtyrýlar engizdi. Qazir atalǵan zań jobasy QR Premer-Mınıstri Keńsesiniń qaraýynda jatyr. Jospar boıynsha aǵymdaǵy jyldyń 20 sáýirinde QR Parlamentine usynylady.
