Temeki satý jónindegi zańnama talaptaryn buzǵandarǵa jaýapkershilik kúsheıtildi
NUR-SULTAN. QazAqparat – Parlament Májilisiniń jalpy otyrysynda «Qazaqstan Respýblıkasynyń keıbir zańnamalyq aktilerine densaýlyq saqtaý máseleleri boıynsha ózgerister men tolyqtyrýlar engizý týraly» zań jobasy ekinshi oqylymda maquldandy, dep habarlaıdy QazAqparat tilshisi.
Zań jobasy aǵymdaǵy jylǵy 4 naýryzda birinshi oqylymda maquldandy.
Zań jobasyn talqylaý barysynda depýtattar birqatar usynystar men tolyqtyrýlar engizdi. Atap aıtsaq:
- Ákimshilik quqyq buzýshylyq týraly kodekske ákimshilik jaýaptylyqty kúsheıtýge baǵyttalǵan túzetýler engizildi;
- Vaktsınalardyń sapasyn arttyrý maqsatynda adam densaýlyǵyna zııan keltirgen jaǵdaıda, vaktsınalardy ákelý, satyp alý, tasý, saqtaý qaǵıdalaryn buzǵany úshin 100-den 1000 aılyq eseptik kórsetkishke deıingi mólsherde ákimshilik aıyppuldar belgilendi;
- Medıtsına qyzmetkerleriniń mártebesin arttyrý maqsatynda medıtsına jáne farmatsevtıka qyzmetkerleriniń kásiptik qyzmetine zańsyz aralasqany úshin ákimshilik aıyppul mólsheri jeke tulǵalarǵa 7-den 50-ge deıin, laýazymdy adamdarǵa 20-dan 75-ke deıin, zańdy tulǵalarǵa 75-ten 150 aılyq eseptik kórsetkishke deıin ulǵaıtyldy.
«Sonymen birge, kámeletke tolmaǵandarǵa temeki jáne temeki buıymdaryn satqany úshin, temeki buıymynyń markasy bar taýarlardy qasaqana taratqany, kórmege qoıǵany nemese satqany úshin ákimshilik aıyppuldar eki ese ulǵaıtyldy. Al temeki jáne temeki buıymdaryn satý jónindegi zańnama talaptaryn, olardy belgilenbegen oryndarda tutynýǵa salynǵan tyıymdy buzǵany, zańsyz jarnamalaǵany úshin ákimshilik aıyppuldardyń mólsheri 30-50%-ǵa ulǵaıtyldy. Avtomobıl kólik quralynda balalar bolǵan kezde onda temeki buıymdaryn tutynǵany úshin 10-nan 20 aılyq eseptik kórsetkishke deıin aıyppul kózdelip otyr», - dedi depýtat Záýresh Amanjolova zań jobasy boıynsha baıandamasynda.
Budan buryn habarlanǵandaı, Parlament Májilisiniń jalpy otyrysynda «Halyq densaýlyǵy jáne densaýlyq saqtaý júıesi týraly» Qazaqstan Respýblıkasy Kodeksiniń jobasy ekinshi oqylymda maquldandy.
Qujat aıasynda Qazaqstanda 21 jasqa deıin temeki satyp alýǵa tyıym salynady.
