Temeki óndiretin kompanııalardyń qandaı da bir is-sharalarǵa demeýshi bolýyna tosqaýyl qoıý kerek - dóńgelek ústel otyrysy
amyrdyń 13-i. QazAqparat /Aıdar Ospanalıev/ - Elde temeki óndiretin kompanııalardyń qandaı da bir is-sharalarǵa demeýshi bolýyna myqty tosqaýyl qoıý kerek. Sebebi bul temekini belsendi nasıhattaýǵa yqpal etetin faktorlar. Bul týraly búgin Parlament Májilisinde
«Qazaqstan zańnamasyn Dúnıejúzilik densaýlyq saqtaý uıymynyń temekige qarsy kúres jónindegi negizdemelik konventsııasyna úılestirý» atty taqyrypta ótken dóńgelek ústel otyrysynda Dúnıejúzilik densaýlyq saqtaý uıymynyń «Temekisiz ómir» jahandyq bastamasynyń dırektory Dýglas Betcherd málim etti, dep habarlaıdy QazAqparat.
Onyń aıtýynsha, Qazaqstan temeki buıymdaryn jarnamalaýǵa tyıym salý, arnaıy belgilengen oryndarda ǵana temeki shegý sııaqty temekige qarsy baǵyttalǵan keshendi sharalardy júzege asyrdy. «Alaıda Qazaqstan tarapynan qolǵa alynýy tıis taǵy bir másele bar. Temeki ónimderin óndiretin kompanııalar demeýshilik kómek kórsetý arqyly ózderiniń ónimderin ótkizýdiń amalyn taýyp júr. Menińshe bul temekiniń taraýyna yqpal etetin taǵy faktor. Sondyqtan múmkindiginshe osy múmkindikti boldyrmaýǵa kúsh salý qajet», dedi halyqaralyq uıym ókili.
Onyń sózine qaraǵanda, temeki óndiretin kompanııalar adam ómirine tónip turǵan qaýip. Al adamdar olardyń arbaýyna kónip, ózderin qurban etpeýleri qajet. «Temeki óndiretin kompanııalar ıglikti ispen aınalysyp otyrǵan joq», dedi Dýglas Betcherd.
