Temeki qorabynyń syrtyndaǵy sýretter kóp adamdy temekiden bas tartýǵa oılandyrǵan

ASTANA. QazAqparat - Temeki shegýshilerdiń 58 paıyzy qorap syrtyndaǵy eskertý sýretterden shylym shegýden bas tartýdy oılastyryp júr. Bul týraly búgin QR Prezıdenti janyndaǵy Ortalyq kommýnıkatsııalar qyzmetinde QR Densaýlyq saqtaý mınıstrligi Salaýatty ómir saltyn qalyptastyrý ulttyq ortalyǵynyń dırektory Jámılá Battaqova málim etti.

Bul Qazaqstanda temeki tutyný týraly turǵyndar arasynda alǵashqy Ǵalamdyq saýalnama (GATS) ótkizý barysynda anyqtaldy. «Jalpy shylym shegetinderdiń 97,6 paıyzy temeki qorabynyń syrtyndaǵy eskertpe sýretterdi baıqaǵan. 58 paıyzy qorap syrtyndaǵy eskertý sýretterden shylym shegýden bas tartýdy oılastyryp júrgenderin aıtqan», - dedi ol.

Atalǵan ǵalamdyq saýalnamaǵa barlyǵy 4 425 adam suraýǵa qatysty. Olardyń ishinde 2 085 - er azamattar, 2 340 - áıelder. Zertteý nátıjesi boıynsha erlerdiń 42,4 paıyzy temeki shegedi, al áıelderdiń úlesi birshama tómen - 4,5 paıyz. Jalpy Qazaqstan halqynyń 22,4 paıyzy nemese 2,8 mıllıon adam temeki shegedi.