Temeki qorabyna pıktogrammalar engizý arqyly 1 mln.-ǵa jýyq qazaqstandyqtyń shylymdy tastaýyna áser etýge bolady

Búgin Dúnıejúzilik temekisiz kúnine oraı QR Densaýlyq saqtaý mınıstrliginde ótken baspasóz máslıhaty barysynda vedomstvonyń vıtse-mınıstri Erik Baıjúnisov osylaı málim etti.

«Kedendik odaq qurylǵaly beri qazaqstandyq tarap halyqaralyq turǵydaǵy temekimen kúres sharalary boıynsha óz ustanymyn nyqtap keledi. Dálirek aıtqanda, Halyq densaýlyǵy jáne densaýlyq saqtaý júıesi týraly kodekske arnaıy ózgeris engizýdi kózdep otyrmyz. Ol boıynsha temekiniń árbir qorabyna shylym shegýdiń zııany týraly eskertýler men pıktogrammalar japsyrý usynylady. Qoraptaǵy pıktogrammanyń fotosýretterinde negizinen ókpe obyry men emfızemasy, mıokard ınfarkti, aıaq-qoldarynyń gangrenasy (shirýi) sııaqty temeki shegýdiń saldarynan týyndaıtyn sumdyq aýrý túrleri beriletin bolady. Dál osy pozıtsııa bizdiń temeki ındýstrııasyndaǵylar tarapynan úlken qarsylyqqa ushyraǵany jasyryn emes. Degenmen, kóptegen pikirtalastar barysynda olarǵa tótep berip kelemiz. Al jaqynda Mınsk qalasynda EýrAzEQ qatysýshylary bizdiń usynysymyzdy maquldady. Endi osy másele boıynsha qoǵamdyq tyńdaýlar ótetin bolady», - dedi E. Baıjúnisov.

Bul rette mınıstrlik ókili atalǵan pozıtsııany aıaǵyna deıin ustanatyndyqtaryn jetkizdi. Onyń aıtýynsha, temeki qorabyna jańadan engiziletin pıktogrammalar temeki ındýstrııasy úshin úlken soqqy bolýy múmkin. «Solaı bolǵany da durys. Biz ózimizge qabyldaǵan mindettemeler boıynsha otandyq temeki ónerkásipteri óndiretin temeki qoraptaryna álgindeı pıktogrammalar engizý úshin 18 aı merzim beretin bolamyz. Al bul ne úshin jasalyp jatyr degenge kelsek, álgindeı adamnyń úreıin alatyn pıktogrammalar temeki qorabyna engizilgennen bastap, Qazaqstanda shylym shegetin 4 mln.-nan astam adamnyń 240 myńy birden temekini tastaıdy dep kútiledi. Al temeki shegetin 840 myń adam jaqyn aralyqta álgi pıktogrammanyń áserinen shylymdy ózdiginen qoıatyn bolady. ıAǵnı, elimiz boıynsha 1 mln. adamnyń temekini tastaýy boljanady», - dedi vıtse-mınıstr.