Temeki ındýstrııasyna qatysty kommertsııalyq múddeler men halyqtyń densaýlyǵyn saqtaý múddeleri jeke-jeke qaralýy shart - M. Voınovıch
Búgin Dúnıejúzilik temekisiz kúnine oraı QR Densaýlyq saqtaý mınıstrliginde ótken baspasóz máslıhaty barysynda Dúnıejúzilik Densaýlyq saqtaý uıymynyń Qazaqstandyq bıýrosynyń basshysy Melıta Voınovıch osylaı málim etti.
«Temeki shegý epıdemııasymen asa tıimdi kúrestiń tásili zańnamalyq bazanyń kúshtiligine jáne onyń tıisti dárejede oryndalýyna baılanysty bolyp tabylady. Bul rette Qazaqstan halyqaralyq konventsııaǵa qosyla otyryp, bul baǵyttaǵy jumysyn jandandyryp otyr. Toqtala ketetin taǵy bir jaıt, Dúnıejúzilik densaýlyq saqtaý uıymynyń temekige qarsy kúres jónindegi Negizgi konventsııasynyń 5-babynda qoǵamdyq densaýlyq saqtaýdyń barlyq baǵyttary jáne halyqtyń densaýlyǵy úshin jasalatyn múddeli sharalardyń barshasy temeki kompanııalarynyń kommertsııalyq múddelerinen jeke qaralýy tıis delingen. Sondyqtan temeki kompanııalary tarapynan shylym shegýdi nasıhattaýǵa qatysty eshqandaı da naqty áreketter bolmaýy kerek», - dedi M. Voınovıch.
Onyń aıtýynsha, halyq pen onyń densaýlyǵy temeki tútininen qorǵalýy shart. Sonymen qatar uıym ókili temekiniń zııandylyǵy týraly onyń qorabyna pıktogrammalardy engizýdiń densaýlyq saqtaý salasy boıynsha mańyzy zor bolatynyn atap ótti. «Árıne, bunda problemanyń eki qyry bar: bir jaǵynan qoǵamdyq densaýlyq saqtaý boıynsha temekiniń zııandylyǵy týraly aıtyp, onyń ólimge aparatynyn eskertip jatsa, ekinshi jaǵynan temeki kompanııalary da óz taýarlaryn satyp alatyn tutynýshylarynyń mol bolǵanyn qalaıdy. Sondyqtan da, temeki ındýstrııasyna qatysty kommertsııalyq múddeler men halyqtyń densaýlyǵyn saqtaý múddeleri jeke-jeke qaralýy shart», - dedi M. Voınovıch.
