Temeki baǵasynyń qymbattaýy zııandy ádetten arylýǵa kómektesedi
ASTANA. QazAqparat - Elimizge kontrabandalyq temeki ónimderi jappaı aǵylýy múmkin. Aktsızderdiń birden 3 ese qymbattaýynyń saldary osyndaı bolady deıdi osy salada júrgen kásipkerler, dep habarlady KTK arnasy.
Qazirdiń ózinde arzan baǵamen saýdalanyp jatqan shylymnyń basym bóligi Reseı men Qyrǵyzstannan jetkizilgen kontrabanda kórinedi. Degenmen, bul kásipkerlerdiń pikirimen múldem kelispeıtinder de kóp. Osyndaı uıymdar elimizde shyǵarylatyn árbir myń temekiniń aktsızin 3900 teńgeden 12 myńǵa deıin kóterý jaıly usynys jasapty. Eger muny Úkimet qoldasa, bir qorap temekiniń baǵasy myń teńgege deıin kóterilmek.
Qymbat shylym - osy jaman ádetke qumarlardyń sanyn eselep tómendetedi deıdi belsendiler. Kásipkerlerdiń de óz ýáji bar. Eýrazııalyq ekonomıkalyq odaq aýmaǵyndaǵy baǵa saıasaty birdeı emes. Eger aktsız qymbattasa, kompanııalardyń basym bóligi kóleńkeli bıznespen aınalysyp, bólshek saýdany qadaǵalaý qıyndaıyn dep tur.
