Temeki aktsızin Reseıdiń deńgeıine kóterse, baǵa qalaı ózgeredi
ASTANA. QazAqparat - Qazaqstanda temeki aktsızderiniń qunyn kórshi Reseıdiń deńgeıine deıin kóterý kózdelip otyr. Al salyqtyń mólsheri artsa, baǵa da kóteriledi. QazAqparat tilshisine suxbat bergen sarapshylar temeki baǵasynyń qalaısha ózgeretinin aıtyp berdi.
Dúnıejúzilik banktiń sarapshysy Polına Kýznetsovanyń aıtýynsha, Qazaqstanda temeki aktsızderin kóterý boıynsha arnaıy zertteý júrgizildi. Sol kezde salyqty arttyrý arqyly temeki ónimderiniń baǵasyn Reseıdiń, tipti Eýropanyń deńgeıine kóterý máselesi zerdelendi.
"Negizi, eki stsenarıı de Qazaqstanǵa keledi. Sebebi bıýdjetke biraz aqsha túsedi. Aktsızdik túsimdi 310 mlrd teńgege deıin arttyrýǵa múmkindik bar. Al, eń bastysy, xalyqtyń densaýlyǵy jaqsarady, temeki shegetinder azaıady. Máselen, 2021 jylǵa deıin Qazaqstan óz aktsızderin Reseıdiń deńgeıine kóterse, onda bir qorap temekiniń baǵasy 530 teńgege deıin artady. Eýropanyń talaptary boıynsha 650 teńge bolady. Al jyl saıyn aktsızdi tek 10 protsentke ǵana kóterip otyrsa, úsh jyldan keıin bir qorap temekiniń baǵasy qatty qymbattamaıdy. Demek, olaı jumys istegen tıimsiz", - dedi P.Kýznetsova.
Onyń aıtýynsha, jyl saıyn temeki aktsızderiniń ındeksatsııasy 30 protsentten tómen túspeýi kerek. Áıtpese, atalǵan dertke qarsy barlyq sharalar tıimsiz bolady.
Al Temekige qarsy koalıtsııanyń múshesi Jámılıa Sadyqovanyń aıtýynsha, Reseıdiń deńgeıine jetý úshin temekiniń 1000 danasyna salynatyn aktsızdiń mólsheri 12 500 teńge bolýy qajet. "1000 dana temekini 20-ǵa bólsek, 50 qorap shyǵady. Endi, 12 500 teńgeni 50-ge bólse, bir qorap temekiniń salyǵy bolady. Ol - shamamen 250 teńge. Temeki óndirýshileri oǵan óz baǵasyn qosady. Sonda Reseıdiń baǵasy shyǵady", - dedi J.Sadyqova QazAqparat tilshisine bergen suxbatynda.
Sarapshynyń atap ótýinshe, búginde Qazaqstanda temeki aktsızderi 7 500 teńgeni quraıdy. Demek, bir qorap temekiniń salyǵy 150 teńgeni quraıdy. Temeki óndirýshileri oǵan óz baǵasyn qosqannan keıin atalǵan ónimderdiń quny 320 teńgeden joǵary bolady. "Negizi, temekiniń baǵasy 700 teńgeden joǵary bolýy tıis. Tipti, 1000 teńgege deıin qoıý qajet. Biraq bizde aktsızdik ósimniń ortasha deńgeıi 30 protsentti quraıdy. Atalǵan kórsetkishti áli arttyrý qajet", - dedi J.Sadyqova.
