Temeki men alkogol bas jáne moıyn obyryna shaldyǵýǵa sebep bolady
Qazaqstanda jyl saıyn 1700 adam bas jáne moıyn obyrymen aýyrady. Bul týraly Almaty onkologııa ortalyǵynyń onkology Samal Toıynbekova aıtty, dep habarlaıdy QazAqparat tilshisi.
Dárigerdiń sózinshe, temeki men alkogol — bas jáne moıyn qaterli isiginiń damý qaýpin arttyratyn negizgi faktorlar. Ony birge paıdalaný qaterdi kúsheıtedi.
«Bas jáne moıyn isigi — bas pen moıynnyń ártúrli bóliginde, máselen aýyz qýysynda, kómeıde, muryn joldarynda, silekeı bezinde, qalqansha bezinde paıda bolatyn qaterli isik. Jyl saıyn Qazaqstanda bas jáne moıyn qaterli isiginiń 1700-ge jýyq jańa jaǵdaıy, qalqansha bezi qaterli isiginiń 700-ge jýyq jańa jaǵdaıy tirkeledi. Bas jáne moıyn qaterli isiginiń damý qaýpin arttyratyn basqa faktorlar da bar. Kún sáýlesiniń astynda uzaq júrý — osy faktorlardyń biri. Sondaı-aq, erin isigi, bas jáne moıyn terisiniń obyry, adam papıllomavırýsy, muryn-jutqynshaq isiginiń damýynda mańyzdy ról atqaratyn Epshteın-Barr vırýsy (EBV), ekologııalyq nemese kásibı ıngalıanttar bar. Taǵy bir faktor bar, ol — jaqyndaryńyzda bas jáne moıyn qaterli isiginiń bolýy», — dedi dáriger.
Statıstıka boıynsha er adamdar bas jáne moıyn qaterli isigine 2-3 ese jıi shaldyǵady. Sondaı-aq bul aýrýǵa 45 jastan asqan adamdar kóbirek beıim bolady.
«Bas jáne moıyn qaterli isiginiń belgileri — uzaq ýaqyt emdelmeı júrgen aýyzdaǵy nemese bas pen moıyn terisindegi aýyrsyný, isiný, jara, bitelgen muryn, jutyný nemese tynys alýdyń qıyndaýy, daýystyń, sóıleýdiń ózgerýi, turaqty kúızelis. Ondaı dıagnoz qoıý úshin bıopsııa, kompıýterlik tomografııa jáne magnıtti-rezonansty tomografııa sııaqty túrli ádis qoldanylady. Bas jáne moıyn obyryn emdeý isikti hırýrgııalyq alyp tastaý, sáýle terapııasy, hımıoterapııa nemese osy ádisterdiń kombınatsııasyn qamtýy múmkin», — deıdi Almaty onkologııa ortalyǵynyń onkology Samal Toıynbekova.
Ol sondaı-aq únemi medıtsınalyq tekserýden ótip, aýrýdyń qandaı da bir belgileri paıda bolǵan jaǵdaıda dárigerge qaralýdyń mańyzyn aıtty.
