Qazaq sportynda jańa tarıh jazdyq – Teljan Qabdıev
NAGOıA. KAZINFORM – Aralas jekpe-jekten (MMA) ulttyq qurama bas bapkeri Teljan Qabdıev Japonıda ótip jatqan HH jazǵy Azııa oıyndaryn qortyndylady.
Bas bapker Kazinform tilshisine sportshylardyń joǵary deńgeıde óner kórsetkenin aıtty.
– Biz osy dodaǵa tyńǵylyqty daıyndalyp, úlken maqsatpen keldik. Jarys jolyna tórt sportshymyz shyǵyp, eki altyn jáne bir qola medal jeńip aldyq. Árıne, qyzymyzǵa sál sáttilik jetpeı qaldy. Biraq sportshylar joǵary deńgeıde óner kórsetti, – dedi ol.
Sondaı-aq Teljan Qabdıev el sportynda jańa tarıh jazylǵanyn atap ótti.
– MMA sporty alǵash ret Azııa oıyndary baǵdarlamasyna qosylǵany barshaǵa belgili. Osyndaı keremet jeńis arqyly elimizdiń osy sporttaǵy áleýetin kórsetip, jańa tarıh jazdyq, – dedi T.Qabdıev.
Bas bapker sóz sońynda barsha qazaqstandyqtardy osy tarıhı jeńispen quttyqtap, qoldaý kórsetkenderi úshin alǵys aıtty.
Eske sala ketsek, Azııa oıyndaryndaǵy MMA básekeleri óz máresine jetti. Qazaqstan quramasy 2 altyn jáne 1 qola medal enshilep, jalpy esepte ekinshi orynnan kórindi.
Erkinǵalı Búrkitalın erler arasynda (77kg) MMA sportynan dástúrli stıl boıynsha jarys jolyna shyǵyp, fınaldyq synda Bahreın sportshysy Muhammed Nabıevti 3:0 esebimen jeńdi.
Qadyrbek Shynbaev Azııa oıyndarynda MMA sportynan erler arasynda (71kg) zamanaýı stılde óner kórsetip, aqtyq synda Tájikstan ókili Hýrshedzoda Behrýzden 3:0 esebimen basym tústi.
Qazaqstan quramasy qazirgi ýaqytta 6 altyn, 1 kúmis jáne 5 qola medalmen jalpy esepte tórtinshi orynda kele jatyr.
