Telejúrgizýshi Ivan Ýrgant efırde Abaı óleńin qazaq tilinde oqydy
ASTANA. 16 mamyr. QazAqparat - Facebook áleýmettik jelisiniń Qazaqstandaǵy paıdalanýshylary keshe reseılik shoýmen Ivan Ýrganttyń Youtube-taǵy beınerolıgin bir-birine qýana taratyp jatty.
Telejúrgizýshi óziniń «Vechernıı Ýrgant» baǵdarlamasynyń efıri arqyly Abaı óleńiniń bir úzindisin qazaq tilinde oqyǵan bolatyn. Qazaqsha sózderdiń keıbirin túsiniksiz oqysa da, feısbýkerlerge qatty unady.
Bul týraly «Ekspress K» basylymynyń tilshisi Natalıa Terenteva «Ýrgant qazaqsha sóılep ketti» atty maqalasynda jazdy.
«Adamdar býlvarlar arqyly serýendep, óleń oqyp, eskertkishter aldynda jınalýda. Ásirese, qazaqtyń uly aqyny Abaıdyń eskertkishi aldynda», - dep Reseıdegi oppozıtsııalyq aktsııalardyń qatysýshylaryn meńzegen telejúrgizýshi, aqyn Abaıdyń «Jazǵyturym» óleńin aıta jóneldi.
Keshe «Eho Moskvy» radıosynyń saıtynda mynadaı bir jańalyq qylań berdi: Máskeý soty Reseı astanasynyń «Chıstye prýdy» býlvaryna Abaı eskertkishi mańynda qurylǵan narazylyq lagerin taratý jóninde sheshim shyǵardy.
Bunyń aldynda sot barysynda tabıǵatty paıdalaný departamentiniń ókili aktsııa nátıjesinde atalmysh orynnyń jasyl jelegi búlinip, memleketke 20 mln-ǵa jýyq rýbl shyǵyn keltirilgendigi týraly málim etken bolatyn. Jáne búgin tańerteń Ortalyq okrýg ІІB qyzmetkerleri sottyń bul sheshimin oryndaýǵa kirisip, aktsııa qatysýshylaryn taraýǵa shaqyrdy.
