Televızııa tarlany S. Orazalynyń «Teledıdar óneri» atty jınaǵy jaryq kórdi
ASTANA. 10 mamyr. QazAqparat - Búgin Astanada kórnekti jazýshy-pýblıtsıst, telejýrnalıst, Halyqaralyq televızııa jáne radıo akademııasynyń akademıgi,
Qazaqstan Respýblıkasynyń eńbek sińirgen qaıratkeri Sultan Orazalynyń «Teledıdar óneri» atty kitabi qalyń jurtshylyqqa tanystyryldy.
«Qazaqstan» telearnasynyń tapsyrysy boıynsha jaryq kórgen jazýshy Sultan Orazalynyń atalmysh eńbegi «Ómirmen ózektes óner», «Teleteatr - ónerdiń jańa túri», «Qazaq zııalylary týraly antologııa», «Óner órisi» atty tórt bólimnen turady. Onda avtordyń televızııa týraly maqalalary, suhbattary, telepesalary men telestsenarııleri toptastyrylǵan.
«Eń alǵashqy maqalalarym 70-jyldary jazylǵan eken. Bul on shaqty jyl televızııada istegennen keıin, bul salany túsine bastaǵannan keıin jazyldy», - deıdi avtor.
Onyń aıtýynsha, kitapta negizinen kórkem televızııa máseleleri qamtylǵan.
«Meniń televızııamen baılanysqanyma 48 jyl bolypty. Óz qolymmen 300-den asa televızııalyq ádebı stsenarıı jazdym. Keıinnen derekti fılmder túsirdim, ondaǵan kórkem beınespektaklderge dramatýrgııalyq shyǵarmalar jazdym, onyń óziniń janrlary ár túrli. Alǵashqylarynyń biri ózderińiz biletin «Qymyzhana», «Suhbat» habarlary», - deıdi S. Orazaly.
«Qazaqstan» RTRK» AQ-nyń basqarma tóraǵasy Nurjan Muhamedjanovanyń aıtýynsha, kitap tek oqyrmandar úshin ǵana emes, sonymen birge jańadan qalyptasyp kele jatqan, jýrnalıstıka fakýltetinde oqıtyn stýdentterge úlken oqýlyq retinde azyq bolatyn dúnıe.
Sultan Orazaly 300-ge jýyq ádebı stsenarıı, 20 shaqty derekti fılmderdiń jáne 40 shaqty ǵylymı-zertteý maqalalardyń avtory. Ol Ǵabıden Mustafın týraly 30 jyl jınaǵan derekterin jańǵyrtyp, fılm túsirdi. Sondaı-aq onyń Salyq Zımanov, Ǵabıden Mustafın, Tahaýı Ahtanov, Sapar Baıjanov, Qýanysh Sultanov, Ábish Kekilbaev jáne elge eleýli basqa azamattar týraly derekti fılmderi qazaq rýhanııatyna qosylǵan altyn úles bolyp qaldy. Sonymen qatar S. Orazaly «Suhbat», «Halyq qazynasy», «Shuǵyla», «Qymyzhana», «Kezdesý», «Aıtys» habarlaryn alǵash uıymdastyryp, efırge shyǵardy.
S. Orazaly QR Prezıdentiniń «Altyn barys» belgisiniń ıegeri, QR Prezıdenti syılyǵynyń, Qazaqstan Jýrnalıster odaǵy syılyǵynyń jáne Abaı atyndaǵy Halyqaralyq ádebı syılyqtyń laýreaty.
