«Televızııa — ómirimniń bir bóligi»: Dına Aımaǵambetova Jibek Joly jáne Silk Way telearnalarynyń efırlik qyzmeti týraly

Jibek Joly / Silk Way telearnalarynyń efırlik qamtamasyz etý qyzmetiniń jetekshisi Dına Aımaǵambetova Kazinform agenttiginiń tilshisine bergen suhbatynda mamandyǵynyń ereksheligi, efırge degen jaýapkershilik, komandalyq jumys jáne bala kúngi armanynyń ómirlik isine aınalǵany týraly áńgimeledi.

— Kásibı jolyńyz qalaı bastaldy? Nelikten dál osy salany tańdadyńyz?

— Televıdenıe salasyna órimdeı jas kezimde assıstent bolyp keldim. Ótkenge kóz salsam, bári keshe ǵana bastalǵandaı kórinedi. Ol kezde meni alda qandaı jol kútip turǵanynan, qanshama nárseni úırenip, qandaı tájirıbe jınaıtynymnan jáne nendeı jaıttardy bastan ótkeretinimnen áli de beıhabar edim. Ýaqyt óte kele, televızııanyń jaı ǵana jumys emes, ózindik ómir yrǵaǵy, emotsııasy, jaýapkershiligi jáne, árıne, adamdary bar erekshe álem ekenin túsindim. Bul sala adamdy ózine qatty baýrap alady! Munda bir-birine uqsaıtyn kúnder óte sırek. Únemi úırenesiń, damısyń, jańa mindetter júkteledi jáne kásibińmen birge ósesiń.

— Búginde siz Jibek Joly / Silk Way telearnalarynyń efırlik qamtamasyz etý qyzmetin basqarasyz. Bul qyzmettiń ereksheligi nede?

— Biz efırdiń sapaly ári ýaqytyly berilýine jaýaptymyz. Eń durysy, kórermen osy úderistiń artynda qanshama jumys turǵanyn baıqamaýy kerek.

Ol teledıdardy qosqanda, sapaly ári úzdiksiz kórsetilimdi kórýi tıis. Jumys dál osylaı uıymdastyrylýy kerek. Alaıda mundaı nátıjege qol jetkizý úshin úlken komandalyq jumys, turaqty baqylaý, dáldik, tártip jáne kez kelgen jaǵdaıǵa jedel áreket etýge daıyn bolý qajet. Efırde usaq-túıek degen bolmaıdy. Kez kelgen qatelik, materıaldyń ýaqytynda berilmeýi nemese tehnıkalyq aqaý búkil habar taratý úderisine áser etýi múmkin. Al baǵdarlamadaǵy ár ózgeris, ádette, eń aldymen efırlik qyzmettiń jumysyna yqpal etedi. Biz úshin úsh sekýndtyń ózi sheksizdik sııaqty. Osyndaı qyzmetti júrgizgende, jumystyń qyr-syryn ózińniń bilýiń ǵana emes, komandany uıymdastyra alý, jaýapkershilikti bólisý jáne áriptesterińe sený de mańyzdy. Biz árdaıym daıyn otyrýymyz kerek, óıtkeni televızııa táýlik boıy habar taratady. Efır kútpeıdi, sondyqtan «Muny erteń shesheıik» deýge múmkindik joq. 

Bizdiń qyzmette 40-tan astam adam jumys isteıdi. Sondyqtan jumysty naqty uıymdastyrý men ózara túsinistik aıryqsha mańyzdy. Meniń oıymsha, basshylyq etý degenimiz — tek tapsyrma berip, nátıje talap etý emes, qyzmetkerlerdi tyńdaı bilý, olardy túsiný jáne qıyn sátterde qoldaý kórsetý.

— Kóp jumys kadr syrtynda atqarylatynyn atap óttińiz. Tolyǵyraq aıtsańyz…

— Jumystyń negizgi bóligi kadr syrtynda isteletini ras. Birneshe saǵatqa sozylatyn daıyndyq, materıaldardy tekserý, kelisý, efır kestesin baqylaý jáne túrli jumys máselelerin sheshý tárizdi sharýalardy aıtýǵa bolady. Keıde sanaýly mınýttyń ishinde búkil jospardy ózgertip, sheshim taýyp, kórermen eshteńeni baıqamaıtyndaı jaǵdaı jasaýǵa týra keledi. Birde bári jospar boıynsha tynysh ótip jatady da, kenet «Shuǵyl túrde tikeleı efırge shyǵamyz!» degen tapsyrma túsedi. Mundaıda dereý áreket etip, efırden oryn bosatyp, translıatsııany jedel qosý kerek. Translıatsııa aıaqtalǵan soń, kórermen ózi kútken baǵdarlamany kórýi úshin josparlanǵan kestege dál solaı shapshań oralý qajet. Ekrannyń ar jaǵynda sondaı ábiger bolsa da, ony, álbette, kórermenge esh baıqatpaý mańyzdy, ıaǵnı baǵdarlama minsiz kórsetilýi tıis. Bizdiń telearnalar Prezıdenttiń Teleradıokesheni quramyna kiretindikten, efırge qoıylatyn talaptar erekshe. Qysqasy, qatelesýge quqyǵymyz joq! Efırdiń turaqty ári úzdiksiz berilýiniń artynda tek habar taratýǵa tikeleı jaýapty mamandar ǵana emes, jýrnalıster, redaktorlar, rejısserler, operatorlar, tehnıkalyq mamandar jáne basqa da kóptegen qyzmetker tur. Olardyń esimderi ekrannan únemi atala bermeıdi, biraq árqaısysy ortaq nátıjege óz úlesin qosady.

Televızııa — ár maman mańyzdy ról atqaratyn úlken mehanızm. Bizdiń jumysymyzdyń erekshe qundylyǵy da osynda shyǵar. Kórermen nátıjeni kóredi, al biz sol nátıjeni usyný úshin qanshama eńbek, jaýapkershilik pen kúsh-jiger jumsalatynyn jaqsy bilemiz.

— Sizdiń mamandyǵyńyzdaǵy eń qymbat, eń qundy dúnıe ne? Osynsha jyldan keıin de, jumysqa degen qyzyǵýshylyǵyńyzdy saqtaýǵa qandaı sebepter bar?

— Televızııada qyzmet etý bala kezimnen bergi armanym bolatyn. Búginde men ózim armandaǵan mamandyqqa kelip qana qoımaı, osy salada uzaq jyl boıy eńbek etý baqytyna ıe bolǵanymdy túsinemin.

Men úshin eń qundysy — adamdar. Atap aıtqanda, kezinde meni osy úlken televızııa álemine qabyldap, úıretken, qoldaǵan jáne kásibı turǵydan ósýime múmkindik bergen jandar. Olardy árdaıym rızashylyqpen eske alamyn. Qaı jerden bastaǵanymdy jáne osy jolda qanshama janmen kezdeskenimdi eshqashan umytpaımyn.

Ózara senim, qoldaý jáne tatýlyq bar ujymda jumys isteý baqyty buıyrdy. Bir-birimizdiń jetistikterimizge qýana biletinimizdi jáne jaqsy nátıje búkil komandanyń eńbegi ekenin túsinetinimizdi joǵary baǵalaımyn.

Kásibime degen súıispenshiligim pen birge jumys istep, damyp, alǵa umtylǵym keletin áriptesterim — meniń uzaq jyl boıy osy mamandyqta qalýyma yqpal etetin basty kúsh. Televızııa men úshin jaı ǵana jumys emes, bul — meniń otbasym, ómirimniń úlken bir bóligi.

Aıta keteıik, buǵan deıin Jibek Joly arnasyndaǵy jańa joba jóninde jazǵanbyz.