Teleradıoarnalarda balalarǵa zııandy taýarlardy jarnamalaýǵa ýaqytsha shekteýler engizilmek
ASTANA. KAZINFORM – Ulttyq teleradıoarnalarda balalarǵa zııandy taýarlardy jarnamalaý boıynsha ýaqytsha shekteýler engizý máselesi pysyqtalyp jatyr. Bul týraly Senat depýtattarynyń saýalyna Premer-Mınıstrdiń orynbasary Tamara Dúısenovanyń jaýabynda aıtylǵan.
«Qazirgi ýaqytta quramynda qant bar sýsyndarǵa salyq engizý máselesi Parlament Májilisinde qaralatyn «Keıbir zańnamalyq aktilerge densaýlyq saqtaý máseleleri boıynsha tolyqtyrýlar men ózgerister engizý týraly» Zań jobasy aıasynda qaralýda», - dedi vıtse-premer-jaýabynda.
Onyń atap ótýinshe, Densaýlyq saqtaýdy damytýdyń 2026 jylǵa deıingi tujyrymdamasynda durys jáne utymdy tamaqtaný jáne salaýatty ádetterdi balalar arasynda qalyptastyrý máseleleri boıynsha aqparattyq-túsindirý jumystaryn júrgizý kózdelgen.
«Densaýlyq saqtaý, Mádenıet jáne aqparat mınıstrlikteri ulttyq teleradıoarnalarda balalarǵa zııandy taýarlardy jarnamalaý boıynsha ýaqytsha shekteýler engizý máselesin pysyqtaýda. Qoǵamdyq densaýlyqtyń ózekti máseleleri boıynsha organdar men uıymdardy uıymdastyrýshylyq-ádistemelik súıemeldeýdi, salaýatty ómir salty men durys tamaqtaný qaǵıdattaryn engizý jónindegi baǵdarlamalardy ázirleýdi DSM Medıtsınalyq kómekti uıymdastyrý departamentiniń Qoǵamdyq densaýlyq saqtaý jáne ońaltý basqarmasy men DSM «Qoǵamdyq densaýlyq saqtaý ulttyq ortalyǵy» ShJQ RMK júzege asyrady», - dedi Tamara Dúısenova.
