Teleradıo habarlaryn taratý týraly zań qabyldandy - Parlament
ASTANA. 28 jeltoqsan. QazAqparat /Qanat Mámetqazyuly/ - Búgin QR Parlamenti Senatynyń jalpy otyrysynda palata depýtattary «Teleradıo habarlaryn taratý týraly» Qazaqstan Respýblıkasy zańyn qabyldady.
Atalǵan qujattyń maqsaty teleradıo habarlaryn taratý qyzmetin júzege asyrý kezinde týyndaıtyn qatynastardy retteıtin normalardy zańnamalyq bekitý, teleradıo habarlaryn taratý sýbektileriniń quqyqtary men mindetterin aıqyndaý bolyp tabylady.
Bul rette qujat arqyly respýblıka halqyn efırlik tsıfrlyq teleradıo habarlaryn taratýmen tolyq qamtý, teleradıo habarlaryn taratý salasynda biryńǵaı normatıvtik quqyqtyq bazany jetildirý kózdeledi. Efırlik tsıfrlyq, kabeldik, jerseriktik jáne teleradıo habarlaryn taratýdyń basqa da túrleriniń biryńǵaı standarttary men parametrlerin qalyptastyrý, otandyq televızııa jáne radıoarnalarynyń básekege qabilettiligin arttyrý kózdeledi.
Budan basqa, ýákiletti organ sheteldik jáne otandyq teleradıo arnalardy esepke qoıýdy júzege asyryp, teleradıo habarlaryn taratýshy operatorlar ǵana lıtsenzııalanatyn bolady. Budan bólek, qujatta otandyq tele-radıoarnalardyń kontentiniń sapasy men quramyn jaqsartýǵa jáne jer ústindegi jerseriktik qabyldaǵysh qurylǵylardy sertıfıkattaýǵa erekshe nazar aýdarylady.
Sondaı-aq, balalar men jasóspirimderdiń psıhıkalyq jáne ımandylyq turǵydan damýyna zııan keltirýi múmkin aqparatty shekteıtin normalar da qujatta qamtylyp otyr.
Zań jobasyn talqylaý barysynda senatorlar qujatqa birqatar ózgerister engizgen bolatyn. Atap aıtqanda, depýtattar biliktilik talaptaryn aıqyndaý, mindetti teleradıoarnalarynyń tizbesin qalyptastyrý boıynsha konkýrs ótkizý, jıilikterdiń beldeýlerin, radıojıilikterdi konkýrstyq negizde bólý, otandyq jáne sheteldik teleradıoarnalardy esepke qoıý sekildi máseleler boıynsha Úkimettiń jáne osy saladaǵy ýákiletti organnyń quzyretteriniń arajigin ajyratý jóninde túzetýler engizdi.
Sondaı-aq, shet eldegi qandastarymyz úshin memlekettik tildi damytý jáne elden tysqary jerlerde júrgen qazaq tildi halyqty aqparatpen qamtamasyz etý maqsatynda otandyq teleradıoarnalardy sheteldik aýdıtorııa úshin translıatsııalaý normalary engizilgen.
Parlament qabyldaǵan zań Memleket basshysynyń qol qoıýyna jiberiledi.
