Telemedıtsına: kimder jıi júginedi jáne qandaı aýrýlar boıynsha keńes alady
ASTANA. KAZINFORM – Qazaqstanda telemedıtsına qyzmetin eń kóp 60 jastan asqan azamattar paıdalanady. Sonymen qatar qashyqtan kórsetiletin medıtsınalyq kómektiń basym bóligi skrınıngtik tekserýlerge, júrek-qantamyr aýrýlaryn baqylaýǵa, júktilikti júrgizýge jáne qant dıabeti boıynsha konsýltatsııalarǵa tıesili. Bul týraly Ulttyq ǵylymı densaýlyq saqtaýdy damytý ortalyǵy basqarma tóraǵasynyń orynbasary Ádilet Tabarov aıtty.
Onyń aıtýynsha, qashyqtan kórsetiletin medıtsınalyq kómek (QKMQ) kóbine turaqty baqylaýdy qajet etetin patsıentterge kórsetiledi.
– Qashyqtan kórsetiletin medıtsınalyq kómektiń basym bóligi skrınıngtik zerttep-qaraýlar sheńberinde kórsetiledi. Sonymen qatar telemedıtsına júrek-qantamyr aýrýlary, júktilikti baqylaý, qant dıabeti, týberkýlez, gıpertonııalyq aýrý jáne qaterli isikke shaldyqqan patsıentterdi baqylaý men konsýltatsııa berý kezinde keńinen qoldanylady. Bul qashyqtan medıtsınalyq qyzmet kórsetýdiń túrli baǵyttarda tıimdi paıdalanylyp otyrǵanyn kórsetip otyr, - dedi spıker.
Ortalyqtyń málimetinshe, telemedıtsına arqyly kórsetilgen qyzmetterdiń eń úlken úlesi – skrınıngtik baǵdarlamalarǵa tıesili. Olar barlyq qashyqtan kórsetilgen medıtsınalyq kómektiń 26%-y.
– Sonymen qatar júktilikti baqylaý boıynsha kórsetilgen qyzmetterdiń úlesi – 6,5%, qant dıabeti boıynsha – 6,2%, gıpertonııalyq aýrý boıynsha – 5%, týberkýlez boıynsha – 3,6%, al qaterli isikter boıynsha 2,6%, - dedi basqarma tóraǵasynyń orynbasary.
Jas ereksheligine kelsek, ortalyq málimetinshe, telemedıtsına qyzmetine eń kóp júgingender – 60 jastan asqan azamattar. Olar barlyq paıdalanýshylardyń 32,4%-yn quraǵan.
– 45–59 jas aralyǵyndaǵy azamattardyń úlesi – 25,5%, al 30–44 jas sanatyndaǵylar – 18,5%. Al eń tómen kórsetkish 0–17 jas aralyǵyndaǵy balalar arasynda tirkelgen. Bul jas tobynyń úlesi 14,7%, - dedi Ádilet Tabarov.
Aıta keteıik, buǵan deıin Densaýlyq saqtaý mınıstrligi telemedıtsınalyq qyzmetterdi damytýǵa jańa standarttar engizgen edi.
