Telemedıtsına ortalyǵynyń pandemııamen kúreste úlesi qandaı
ALMATY. QazAqparat – Almatyda telemedıtsına ortalyǵynyń reanımatologtary pandemııa bastalǵaly beri 2 myń ret keńes berýge shyqqan. Bul týraly búgin onlaın brıfıng barysynda Reanımatsııalyq jumys jáne COVID-19 juqtyrǵan naýqastardy emdeý máseleleri boıynsha Almaty qalasy Qoǵamdyq densaýlyq saqtaý basqarmasynyń shtattan tys bas reanımatolog-anestezıology Tileýberdi Qýandyqov aıtty, dep habarlaıdy QazAqparat tilshisi.
«Bizdiń mamandar pandemııa bastalǵaly beri 2 myń shaqyrýǵa shyqty. Óte aýyr haldegi 5 myń naýqasqa keńes berdi. Vıdeobaılanys arqyly 100 konferentsııa ótkizdi. Osy jumystardyń arqasynda shilde aıynyń ortasynan bastap koronavırýstan adam ólimi tómendeı bastady», - dedi Tileýberdi Qýandyqov.
Onyń aıtýynsha, qazir Almatyda 11 ınfektsııalyq statsıonar jasaqtalǵan. Qajettilik bolǵan jaǵdaıda bul statsıonarlar qarqyndy terapııa bólimine aınala alady.
«Bul statsıonarda 250 reanımatsııalyq tósek bar. Taǵy 150 tósek ekinshi tolqyn bolǵan jaǵdaıda rezervte tur. Búginde reanımatsııalyq oryndar asa tolmaǵan. Táýligine 20-30 adam ǵana túsedi. Qazir Almatyda 15-20 adamnyń jaǵdaı óte aýyr nemese turaqsyz dep baǵalanyp otyr», - dedi Tileýberdi Qýandyqov.
Maman kóbinese qarqyndy terapııa bólimine 65 jastan asqan azamattar túsetinin jetkizdi.
«Olardyń kópshiliginde qosarlanǵan sozylmaly dıagnozdary bar. Búırek, júrek jetkiliksizdigi, qant dıabeti, ınsýlt alǵan taǵy basqa naýqastarda koronavırýs bary keıin anyqtalyp jatady», - dedi T.Qýandyqov.
Jansaqtaý bóliminde jatqan naýqastardyń jartysy – áıelder, jartysy - er adamdar.
«Olardyń 30 paıyzy ókpeni jasandy jeldetý apparatyna qosylǵan. Qaıtys bolǵan naýqastardyń kópshiliginde júrek-qantamyr aýrýy, qant dıabeti, tsırroz, onkologııalyq aýrýlar, aýtoımmýndy derti bar bolyp shyqqan. Keıde óte qart kisiler, fızıologııalyq múmkindigi az adamdar da kóz jumady», - dedi Tileýberdi Qýandyqov.
