Telemedıtsına ortalyǵy arqyly 5 myńnan astam almatylyq keńes aldy
ALMATY. QazAqparat - Almatyda 2020 jyldyń qarashasynan bastap koronavırýstyń jańa tolqynyna daıyndyq aıasynda megapolıs ákimi Baqytjan Saǵyntaevtyń bastamasymen iske qosylǵan Telemedıtsına ortalyǵynan 5 myńnan astam adam kómek alǵan, dep habarlaıdy QazAqparat tilshisi.
Ortalyqtyń negizgi mindeti - COVID-19 rastalǵan jaǵdaılary bar úı karantınindegi patsıentterdi baqylaý, baqylaý.
Ortalyqta 50 qyzmetker jumys isteıdi, olar halyqqa táýlik boıy konsýltatsııalyq kómek kórsetedi. Ortalyq dárigerleri koronavırýsty emdeý máseleleri boıynsha beıne keńes beredi. Kúnine 1200-1500 shyǵys jáne kiris qońyraýlary pysyqtalady.
«Eger bizge habarlasqan adamnyń koronavırýstyq ınfektsııaǵa tán belgileri úshten kóp bolsa, biz olardy saralaımyz, tólqujat málimetterin jınaımyz. Keıin aýmaqtylyǵy boıynsha tekserý jáne PTR-testileý júrgizetin mobıldi brıgadany jiberemiz. Nátıjesi oń bolyp shyqqan jaǵdaıda mamandar tekseredi jáne aýrýhanaǵa jatqyzý nemese ambýlatorlyq deńgeıde emdeý máselesi sheshiledi. Oqshaýlanatyndaı jaǵdaıy bolmasa, ınfektsııalyq statsıonarǵa jatqyzylady, al eger múmkindigi bolsa, adam 14 kúnge oqshaýlanady, onyń barysynda ol bizde qaralady. Bizde emhanalarǵa portal quryldy, onda bizge patsıentter týraly, olardyń qansha ýaqyt úı karantıninde ekendigi týraly barlyq derekter jiberiledi», - dedi Ortalyqtyń bas menedjeri Juldyz Baýyrjanqyzy.
Aýmaqtyq emhanalardyń dárigerleri patsıentterdi tekserip, em taǵaıyndaıdy. Ortalyq qyzmetkerleri osy patsıentterdiń jaǵdaıyna baqylaý júrgizedi. Úı statsıonaryndaǵy patsıentterdiń jaǵdaıy nasharlaǵan kezde olar dereý aýrýhanaǵa jatqyzylady. COVID-19 rastalǵan jaǵdaılary bar patsıentter aýrýhanaǵa jatqyzylǵannan keıin de mamandardyń baqylaýynda bolady.
Bul ortalyqtyń taǵy bir fýnktsııasy - patsıentterdiń karantın rejımin saqtaýyn baqylaý. Ortalyq qyzmetkerleri patsıentterge únemi beıne qońyraý shalyp turady, olardyń emdelýin jáne úılerinen shyqpaýyn baqylaıdy. Bul jumys baqylaýda turǵan patsıentter arasynda karantındik rejımniń buzylýyn jedel anyqtaýǵa múmkindik beredi.
Búgingi tańda ortalyq mamandarynyń baqylaýynda 587 adam bar. Ashylǵannan beri barlyǵy 5 383 naýqas baqylaýda boldy. Osyǵan deıin ortalyq 14 349 kiris qońyraýyna qyzmet kórsetti.
