Telekórý reıtıngin ólsheýdiń balamalyq joldaryn qarastyrý kerek - Erlan Qarın
ASTANA. KAZINFORM - «Qazaqstan» telearnasy memlekettik tildiń qoldaný aıasyn keńeıtýde ózge BAQ-qa úlgi bolady. Bul týraly búgin QR Aqparat jáne kommýnıkatsııalar mınıstrligi janyndaǵy qoǵamdyq keńes otyrysynda «Qazaqstan» teleradıokorporatsııasy basqarmasynyń tóraǵasy Erlan Qarın bildirdi, dep habarlaıdy QazAqparat.
«Qazaqstan» teleradıokorporatsııasy teleradıoaýdıtorııanyń suranysyna, talaptaryna sáıkes óz medıaktıvterinde memlekettik tildiń qoldaný aıasynyń keńeıtý saıasatyn júrgizýde. Biz basqa da BAQ ókilderine osy baǵyt boıynsha úlgi bola alamyz degen oıdamyz. BAQ salasyndaǵy memlekettik tildiń damýyna yqpal etetin taǵy bir faktor - zertteýshi kompanııalardyń ólsheýleriniń sapasynda. Alaıda olardyń júrgizetin ólsheý-zertteýleri kórermenderdiń teledıdar kórý reıtıngin obektıvti jetkizbeıdi. Mysaly «TNS Central Asia» kompanııasy turǵyndary 100 myńnan asatyn qalalar boıynsha, zertteýdi tek 2200 tirkelgen abonenttermen júrgizgen. Olardyń aıtýynsha, suralǵan respondentterdiń 58 paıyzy qazaq tildi. Alaıda ol respondentterdiń Astana jáne Almaty qalalarynda, basqa da ortalyqtandyrylǵan iri qalalarda ornalasqandyqtaryn eskerý qajet. Al qazaq tildi aýdıtorııanyń basym bóligi iri qalalarda emes, qala shetinde, aýyldy eldi mekenderde turady. Sondyqtan, olardyń talǵamdary eskerilmeı qalady», - dedi Erlan Qarın.
Sol sebepti ol kompanııa usynǵan ólshemder naqty jaǵdaıdy eskermeıtindigin basa aıtty. Mysaly, joǵaryda aıtylǵan kompanııa ótken aptanyń úsh kúninde (sársenbi, beısenbi, juma) 60 paıyz kórsetkishti tek «1-arna» men «KTK» telearnalarynyń úlesine bergen.
«Sondyqtan, telekórýdiń ólshemderiniń sapasyn joǵarylatý úshin, reıtıngti ólsheýdiń basqa da balamalyq joldaryn qoldaný kerek. Baǵdarlamalardyń tanymaldylyǵy jaıyndaǵy aqparatty bilý úshin balamaly zertteý joldaryn qoldanysqa engizý qajet. Mysaly, saýalnama, blıts-ıntervıý, áleýmettik zertteýler, fokýs grýppalardyń zertteýlerin, onlaın rejimdegi ınteraktıv sııaqty joldardy sapaly ári naqty, shynaıy nátıje úshin qoldaný kerek. Medıaólshemderdiń balamaly júıesin qoldaný, bizge jańa baǵdarlamalar ashý, baǵdarlamalardyń qurylymy, quramy, efırlik setkanyń qurastyrylýy jóninde durys sheshim qabyldaýǵa kómektesedi. Odan bólek, obektıvti statıstıkany qurý úshin, quzyretti organdarmen birge ólsheý metodologııasynyń jetildirý jumystaryn júrgizý kerek. Bul isti júzege asyrý úshin, «TNS Central Asia» kompanııasymen, telearnalarmen, statıstıka agenttigimen jáne basqa da múddeli uıymdarmen jumysty júıeleý kerek», - dedi «Qazaqstan» teleradıokorporatsııasynyń basshysy.
