Telekópir: Jambyl oblysynda «Býrnoe Solar-2» kún elektr stantsııasy iske qosyldy
Jobanyń quny 25 mıllıard teńgeni quraıdy. Quryltaıshy «Samruk Kazyna - United Green» jaýapkershiligi shekteýli seriktestigi. Stantsııada «jinko Solar» (QHR) kompanııasynyń 185 174 fotoelektrlik modýli, Sungrow (QHR) óndirisiniń 16 ınvertorlyq stantsııasy ornatylǵan.
Aıta keteıik, stantsııanyń qurylys kezeńinde 300-ge jýyq jumysshy tartylǵan bolatyn. Al paıdalaný kezeńinde 45 jańa jumys orny ashyldy. Bul týraly Memleket basshysyna tikeleı beınebaılanys arqyly joba jetekshisi, seriktestiktiń bas dırektory Nurlan Qapenov aıtyp berdi.
Onyń aıtýynsha, joba elektr energııasyn óndirýdiń ekologııalyq taza ádisin qarastyrady. Elektr energııasynyń jyldyq boljamdy óndirisi 78,2 mln kVt*saǵ quraıdy, bul shamamen 40 myń turǵyn úıdi elektr energııasymen qamtamasyz etýge múmkindik beredi. Bul jylyna 95 myń tonnadan astam SO2 shyǵaryndysynyń aldyn alady. Kún elektr stantsııasy elimizde, onyń ishinde oblysta elektr energııasynyń tapshylyǵyn jabýǵa úlken úles qosady. Ortalyq Azııadaǵy eń iri KES bolyp tabylatyn joba elektr energııasyn óndirýdiń ekologııalyq taza ádisin qarastyrady. Jaryq kúni 660-680 myń kVt/saǵ shamasynda óndire alady. Bul 80 myń turǵyn úıdi energııamen qamtamasyz etýge qaýqarly.
Elbasynyń pármenimen iske qosylǵan kún elektr stantsııasy Jýaly aýdanyndaǵy Nurlykent aýylynyń mańy, Batys Qytaı - Batys Eýropa avtomagıstraliniń boıynda ornalasqan. Ekinshi kezeńde salynǵan nysannyń aýmaǵy 74 gektar jerdi alyp jatyr.
Aıta keteıik, Elbasy Nursultan Nazarbaevtyń tapsyrmasyna sáıkes balamaly jolmen elektr qýatyn óndirý isi boıynsha Jambyl oblysy respýblıka óńirleri ishinde kósh bastap keledi. Búginde oblysta kúnnen, jelden jáne sýdan energııa óndiretin 168 megavattyq 10 stantsııa bar. Olarda oblys halqy tutynatyn elektr energııasynyń 16 paıyzy óndiriledi. 2020 jylǵa qaraı bul kórsetkishti 60 paıyzǵa jetkizý kózdelýde.
Ǵıbrat Sembaı
