Telekópir: Eski kólikterdi óńdeıtin Qazaqstandaǵy tuńǵysh zaýyt ashyldy

ASTANA. QazAqparat - Astanada ótip jatqan «Jańa ındýstrııalandyrý: qazaqstandyq barystyń qadamy» ulttyq telekópiri barysynda Elbasy Nursultan Nazarbaev Qaraǵandy oblysyndaǵy eski kólikterdi óńdeýmen aınalysatyn zaýytty iske qosty, dep habarlaıdy QazAqparat.

«Recycling Company» JShS Qamqorshylyq keńesiniń múshesi Aıdyn Nurahmetovtyń sózine qaraǵanda, bul - Qazaqstandaǵy eski kólikterdi óńdeýge arnalǵan alǵashqy zaýyt. Ony tek 9 aıdyń ishinde tolyq iske qosýǵa múmkin boldy.

«Joǵary tehnologııalyq jabdyqtar jylyna tozyǵy jetken 50 myń avtokólikti óńdeýge múmkindik beredi. Osy oraıda 20 myń tonnadan astam qara ári tústi metall óndirýge jol ashylmaq. Barlyq tehnologııalyq úderis qorshaǵan ortaǵa zııanyn keltirmeıdi. Prezıdent myrza, biz óńir men barsha eldiń damýy úshin eleýli úles qosýǵa ýáde beremiz. Óndiristi iske qosýǵa ruqsat berińiz!», - dedi A. Nurahmetov.

Óz kezeginde Prezıdent Nursultan Nazarbaev elimiz joldaryndaǵy avtokólikter sany eleýli túrde artqanyn aıta kele, sondaı-aq olar tozǵan kezde óńdeıtin tıisti óndiris qajet bolǵanyn jetkizdi.

«Bundaı óndiris bolmasa, eskirgen kólikter qorshaǵan ortaǵa zııanyn tıgizedi. Sondyqtan bul zaýyt metaldardy qaıta óńdeýge múmkindik beredi. Búginde elimizde jeńil avtokóliktiń 18 túri óndiriletinin eskersek, sizderdiń jumystaryńyzdyń bolashaǵy zor», - dedi Elbasy.