Telekommýnıkatsııa qaýymdastyǵy qurylady - Baǵdat Mýsın shaǵyn operatorlardyń paıdasy týraly aıtty
Tsıfrlyq damý, ınnovatsııalar jáne aeroǵarysh ónerkásibi mınıstrliginde shaǵyn operatorlar men jergilikti atqarýshy organdardyń úı sharýashylyqtaryna turaqty túrde ınternet ornatý máselesi jan-jaqty qarastyryldy, dep habarlaıdy Kazinform.
Osy oraıda, sala jetekshisi Baǵdat Mýsın "Shaǵyn operatorlardy ne úshin qoldaý qajet?" degen saýalǵa jaýap berdi.
"Shaǵyn operatorlar klıenttiń máselelerin anaǵurlym tıimdi sheshedi, aýyldyq jerlerge Internetti jetkizý kezinde barynsha jedeldik tanytady, sondaı-aq, olar klıentke baǵyttalǵan qyzmet atqarady jáne tómen abonenttik tólem usynady. Shaǵyn operatorlardyń damýy naryqta jaqsy básekelestikke jol ashady. Sonymen qatar, shaǵyn jáne orta operatorlar senimdi jumys oryndaryn ashady, óz qyzmetkerleriniń telekommýnıkatsııa salasynda damýyna kómektesedi.
Іs júzinde shaǵyn jáne orta baılanys operatorlary birqatar problemamen betpe-bet keletini jasyryn emes. Máselen, jaryqtandyrý tirekteri jergilikti atqarýshy organdardyń balansynda bolady, al mundaı jaǵdaıda, jergilikti atqarýshy organdar talshyqty-optıkalyq baılanys jelisin tartý úshin quqyqtyq negiz taba almaı qalýy múmkin nemese tirekti jalǵa berý qunyn anyqtaı almaıtyn jaǵdaı da týyndap jatady", - dedi mınıstr.
Jıynda jaryqtandyrý tirekterine talshyqty-optıkalyq baılanys jelisin tartý (birlese tartý) qaǵıdalaryn ázirleý, tirekterdiń kez kelgen memlekettik/kvazımemlekettik ıesi úshin aıyna 1 tirek úshin 50 teńgeden aspaıtyn mólsherde bir tirekti jalǵa alýdyń shekti mólsherlemesin belgileý, «Qoljetimdi Internet» ulttyq jobasyn iske asyrý úshin tirekterdi tegin paıdalaný múmkindigine qol jetkizý, qos maqsatty tirekter retinde jaryqtandyrý tirekterin qosý arqyly «Qos maqsatty tirekterde telekommýnıkatsııalar quraldaryn ornalastyrý qaǵıdalaryn» ózgertý usynylǵan.
Mınıstrlik aldaǵy ýaqytta operatorlardyń barlyq usynysyn zerttep, eskermek.
"Sonymen qatar, telekommmýnıkatsııa salasyn damytý máselelerin jáne shaǵyn jáne orta operatorlardyń onyń damýyna qalaı oń áser etetinin talqyladyq.
Búgingi tańda iri operatorlarda Ulttyq telekommýnıkatsııa qaýymdastyǵy bar, ol naryqtaǵy iri operatorlardyń múddelerin ilgeriletedi. Men óz tarapymnan kúsh-jigerdi biriktirý, mańyzdy máselelerdi kóterý jáne óz quqyqtaryn qorǵaý úshin sala mamandaryna Shaǵyn operatorlar qaýymdastyǵyn qurýdy usyndym. Jaqyn arada operatorlar Telekommýnıkatsııa qaýymdastyǵyn qurady.
Kelesi jyly biz «sońǵy mıldi» tóseý úshin arnaıy granttar berý, shaǵyn jáne orta operatorlardy sýbsıdııalaý boıynsha úlken jobany qolǵa alamyz, ol aýyldardaǵy 300 myń úı sharýashylyǵyn qamtıtyn bolady", - dedi Baǵdat Mýsın.
Sondaı-aq, onyń sózinshe, mınıstrlik zańnamaǵa tıisti ózgerister engizýde. 2022 jyly normatıvtik-quqyqtyq aktilerge elektr baǵanalaryna kabeldi ilýge ruqsat berý boıynsha ózgerister engizildi, bul abonentterdiń Internetke qosylý merzimin jáne kabeldi tóseýge qatysty ınvestıtsııalyq shyǵyndardy qysqartýǵa múmkindik berdi.
"Qazirgi tańda Qazaqstanda 90-ǵa jýyq orta jáne shaǵyn operator jumys isteıdi. Mysaly, qazir Astana ákimdigimen birlesip, turǵyn úı alaptaryn damytý maqsatynda shaǵyn operatorlardy tartý boıynsha jumys júrgizip kelemiz. 2023 jyldyń sońyna deıin jyldamdyǵy joǵary Internet 14 turǵyn úı alabynda, al 2024 jyly 3 turǵyn úı alabynda (Óndiris, Kazgorodok, Kırpıchnyı) júrgiziledi.
Qazirdiń ózinde jelige 5500 abonent qosylyp, 440 shaqyrymnan astam optıkalyq kabel tartyldy, barlyq jumysty 2024 jyldyń sońyna deıin aıaqtaý kózdelip otyr", - degen spıker.