Telekommýnıkatsııa jelilerine zańsyz qosylatyndar bas bostandyǵynan aıyrylady

ASTANA. QazAqparat – Baılanys operatorynyń jelilerin aınalyp ótip, telekommýnıkatsııa jelilerine arnaıy baǵdarlama jáne apparat kómegimen zańsyz qosylǵandar 2 jylǵa sottalaýy múmkin. Bul týraly ózgeris engizilgeli otyrǵan «QR keıbir zańnamalyq aktilerine Qylmystyq, Qylmystyq-protsestik jáne Qylmystyq-atqarý kodeksterin ońtaılandyrý máseleleri boıynsha ózgerister men tolyqtyrýlar engizý týraly» Zań jobasynda kórsetilgen, dep habarlaıdy QazAqparat tilshisi.

«Baılanys toraptaryn aınalyp ótý úshin halyqaralyq trafıkti ótkizý maqsatynda telekommýnıkatsııa jelilerine arnaıy baǵdarlamalyq nemese apparattyq quraldar arqyly zańsyz qosylý – 2 000 myń aılyq eseptik kórsetkishke deıingi mólsherde aıyppul salýǵa ne sol mólsherde túzeý jumystaryna 600 saǵatqa deıingi merzimge qoǵamdyq jumystarǵa tartýǵa ne 2 jylǵa deıingi merzimge bas bostandyǵyn shekteýge ne sol merzimge bas bostandyǵynan aıyrýǵa, belgili bir laýazymdardy atqarý nemese belgili bir qyzmetpen 2 jylǵa deıingi merzimge aınalysý quqyǵynan aıyrýǵa jazalanady», - dep kórsetilgen qujatta.

Qujattyń túsindirmesinde jazylǵandaı, is júzinde adamdar telekommýnıkatsııa jelilerine arnaıy baǵdarlamalar men apparattar arqyly qosylady. Osylaısha olar «Baılanys týraly» QR Zańyn buzady.

«Kiretin/shyǵatyn zańsyz trafıktiń uıymdastyrylǵan tehnıkalyq shemasy terrorıstik uıymdar músheleriniń halyqaralyq qońyraýlaryn (qańtar oqıǵalary kezeńindegideı) tirkeýge múmkindik bermeıdi. Olar baılanys operatorlarynyń bıllınginde jergilikti qońyraýlar retinde kórinedi. Joǵaryda aıtylǵandar baılanys operatorlarynyń jelilerinde qylmystyq elementterdiń kelissózderin baqylaý boıynsha is-sharalardy júrgizýge múmkindik bermeıdi. Qońyraý shalǵan uıaly telefon arqyly qylmyskerlerdi izdeý kezinde bir SIM-kartada 100-den 1000 uıaly nómirge deıin bolady», - delingen jańa redaktsııada.

Jań jobasyn ázirleýshiler bul normany engizý Ulttyq qaýipsizdik komıtetine ekstremızm men terrorızmge qarsy kúres jumystary barysynda aqparat alý aıasyn keńeıtetinin atap ótken. Óıtkeni, mundaı bastama jelilerge zańsyz qosylý týraly jasyryn faktilerin anyqtaıdy.