Telehıkaıa men pop-mýzyka ádebıet pen teatrdy yǵystyryp barady - sarapshy
ASTANA. QazAqparat - Telehıkaıalar men pop-mýzyka ádebıet, teatr, beıneleý óneri sııaqty óner túrlerin yǵystyryp barady. Bul týraly búgin QR Perlamenti Májilisinde ótken jınalysta Eýrazııalyq ıntegratsııa ınstıtýtynyń dırektory Janargúl Qusmanǵalıeva aıtty. Onyń málimetinshe, ınstıtýt júrgizgen áleýmettik saýalnamaǵa elimizdiń túkpir-túkpirinen 1200-den astam adam qatysqan.
"Búginde qazaqstandyqtardyń 85%-y qoldary qalt etse mýzyka tyńdaýǵa áýes. Olar qazaqstandyq ánshilermen qatar sheteldik pop-mýzykanyń jańalyqtarynan da shet qalmaıdy. Al saýalnamaǵa qatysqandardyń 15 paıyzy tek sheteldik mýzykany tyńdaıdy.
Qazaqstandyqtar arasynda otandyq fılmder kóp kóriledi eken. Respondentterdiń 83 paıyzy otandyq kınolardy qaraıtynyn aıtsa, 16 paıyzy múlde kórmegen bolyp shyqty", - deıdi maman.
Onyń aıtýynsha, qazaqstandyq telehıkaıalar da kórermender arasynda úlken suranysqa ıe.
"Mádenıet salalarynyń ishinde búginde ádebıet, mýzeı, kitaphana, teatr sııaqty janrlar aqsap tur. Máselen, saýalnamaǵa qatysqandardyń kóp bóligi qazaqstandyq jazýshylardy múlde oqymaıtynyn aıtty. 58% respondent mýzeılerge múlde barmaıdy. 69%-y qazaqstandyq avtorlardyń teatrlyq qoıylymdaryn múlde kórmegen", - deıdi J. Qusmanǵalıeva.
