Telegram jasandy ıntellektige negizdelgen jańa múmkindikti iske qosty
ASTANA. KAZINFORM — Telegram messendjeri 2026 jylǵy alǵashqy jańartylǵan fýnktsııalaryn usyndy. Jańartýdaǵy basty jańalyq — jarııalanymdardy jasandy ıntellekt arqyly qysqasha mazmundap berý fýnktsııasy. Bul týraly ázirleýshiler kompanııanyń resmı blogynda habarlady, dep jazdy 24 kg.
Endi arnalardaǵy uzaq jazbalardy avtomatty túrde qysqasha nusqada oqýǵa bolady. Paıdalanýshylar jasandy ıntellekt kómegimen jasalǵan yqsham mátinge bir sátte aýysa alady. Ázirleýshilerdiń aıtýynsha, bul múmkindik jańalyq kontentin jyldam sholýǵa jáne oqýǵa ketetin ýaqytty únemdeýge arnalǵan.
Qysqasha mazmun jasaý úshin Cocoon platformasyna negizdelgen ashyq bastapqy kodty modelder qoldanylady. Kompanııa ókilderi árbir suranys shıfrlanǵan túrde óńdeletinin atap ótti, bul paıdalanýshylardyń derbes derekteriniń qupııalyǵyn tolyq saqtaýǵa múmkindik beredi.
Sonymen qatar Telegram iOS júıesine arnalǵan qosymshanyń ınterfeısin Liquid Glass stılinde jańartýdy aıaqtady. Apple qurylǵylaryna tán «suıyq áınek» effektileri endi qosymshanyń barlyq bóliminde qoldanylady. Vızýaldy áserlerdi energııany únemdeý baptaýlary arqyly basqarýǵa bolady, bul júıege túsetin júktemeni azaıtyp, akkýmýlıator qýatyn únemdeýge kómektesedi.
Aıta keteıik, buǵan deıin Telegram syılyq alýǵa arnalǵan aýktsıondaryn iske qosqan edi.