Telegram zerthanasy, JI mýzeıi, tegin mektepter: ALEM.AI ortalyǵynan fotoreportaj
ASTANA. KAZINFORM – Elordada jýrnalıster úshin ALEM.AI alǵashqy JI ortalyǵynyń tehnıkalyq ashylýy ótti. Bul ortalyq 2029 jylǵa deıin qazaqstandyq JI-sheshimder eksportyn 5 mlrd AQSh dollaryna deıin arttyrýǵa múmkindik beredi. Kazinform tuńǵysh JI ortalyǵyndaǵy uıymdar men mektepterge sholý usynady.
Tuńǵysh JI ortalyǵy úshin 2017 jylǵy EKSPO kórmesine salynǵan «Nur álem» pavılony tańdap alyndy. Ázirge ortalyqtyń 1-qabaty ǵana ázir, qalǵan 7 qabatta jóndeý, tolyqtyrý jumystary jalǵasýda. Jyl sońyna deıin ortalyqty tolyqqandy iske qosý josparlanǵan. ALEM.AI ǵylym men óndiristen bastap, kreatıvti ındýstrııalar men memlekettik qyzmetterge deıin birneshe baǵytta jumys isteıdi. Ol JI ekojúıesin damytýǵa, ınvestıtsııa tartýǵa jáne startaptardy qoldaýǵa arnalǵan alań bolady jáne Ortalyq Azııadaǵy jasandy ıntellektiniń jetekshi habyna aınaldyrady.
Ortalyqtyń birinshi qabatynda forýmdarǵa, kópshilik dáristerge jáne jasandy ıntellekt mýzeıine arnalǵan qoǵamdyq keńistikter ornalasqan. Munda JI salasyndaǵy bos oryndar jármeńkeleri, sondaı-aq ınvestorlar men seriktesterdi tartýǵa kómektesetin turaqty hakatondar men startaptar konkýrstary ótedi. Sonymen birge, birinshi qabatta jańa tehnologııalar qııalmen ushtasatyn, ımmersıvti týyndylar, ınteraktıvti taqtalar qoıylǵan. Kelýshiler úshin kovorkıng pen dámhanalar da osy qabatta bolady.
Ekinshi jáne úshinshi qabattarda – 9-12 synyp oqýshylaryna arnalǵan TUMO School ashylady. Onda Astananyń 42 myńnan astam oqýshysy anımatsııa, baǵdarlamalaý, robototehnıka, dızaın jáne basqa kreatıvti tehnologııalar baǵyttary boıynsha baǵdarlamalarǵa jazyla alady. Ekinshi qabat 206 orynǵa eseptelse, úshinshi qabatta – taǵy 348 oryn bar. Sondaı-aq, bul bólikterde toptyq sabaqtarǵa arnalǵan aımaqtar, konferents-zaldar jáne tájirıbelik jobalarǵa arnalǵan zerthanalar qarastyrylǵan.
Al tórtinshi jáne besinshi qabattarda – stýdentter men eresekterge arnalǵan Tomorrow School ornalaspaq. Qazaqstandaǵy alǵashqy peer-to-peer jasandy ıntellekt mektebin Astana Hub tehnoparki 2024 jyldyń qazanynda ashqan edi. Mundaǵy oqý 01EDU platformasynda tegin ótedi jáne baǵdarlamalaý boıynsha bastapqy daǵdylardy talap etpeıdi.
JI jáne tsıfrlyq damý mınıstrliginiń habarlaýynsha, alǵashqy lekke 5 myńnan astam ótinish túsken. Іrikteýden 120 stýdent ótip, tek 30% ǵana negizgi oqýǵa qabyldanǵan. Qazir ekinshi lekte 190 stýdent oqyp jatyr, bolashaqta olardyń sanyn arttyrý josparlanǵan.
Altynshy qabatta – startaptardy akseleratsııalaıtyn jáne ınkýbatsııalaıtyn Startap kampýs ashylady. Munda jańa jobalar iske qosylady, ınnovatsııalar qoldaý tabady jáne kásipkerlik ekojúıesin damytý qolǵa alynady.
Jetinshi qabatta – zertteý jáne tájirıbelik zerthanalar ornalasady. Munda JI salasynda ǵylymı jobalar júrgiziledi, sondaı-aq Telegram-nyń JI zerthanasy jumys isteıdi. Sondaı-aq, Presight, ıAndeks kompanııalary da ókildik ashatynyn rastaǵan.
Sońǵy segizinshi qabat – GovTech-sheshimderge jáne JI tehnologııalaryn qoldaný arqyly memlekettik protsesterdi taldaýmen jáne basqarýmen aınalysatyn sıtýatsııalyq ortalyqqa arnalǵan. Bul sheshimder ekonomıkanyń túrli salalarynda qoldanylady. Osylaısha, bilim berý men zertteýlerden bastap, startaptardy iske qosý jáne ınnovatsııalardy engizýge deıin biryńǵaı ekojúıe qurý kózdelgen.
Aıta keteıik, Astanada Digital Bridge 2025 halyqaralyq tehnologııalyq forýmy bastaldy. Memleket basshysy Qasym-Jomart Toqaev forýmnyń plenarlyq otyrysynda cóz sóıleıdi.
Jıynǵa Qazaqstanǵa resmı saparmen kelgen Majarstan Prezıdenti Tamash Shýıok, Telegram negizin qalaýshy jáne bas atqarýshy dırektory Pavel Dýrov, Sinovation Ventures jáne 01ai bas dırektory Lı Kaı Fý, Stenford ýnıversıtetiniń ǵylymı qyzmetkeri, Google sarapshysy Pıter Norvıg, G42 International kompanııasynyń bas dırektory Mansýr Ibragım Ál Mansýrı, Stenford ýnıversıtetiniń professory Ilıa Sterbýlaev keldi.
Pavel Dýrov Alem.ai ǵımaratynda jasandy ıntellekt salasyndaǵy arnaıy zerthanasyn ashty.
Elimizde 1414 qyzmetiniń árbir 50-shi qońyraýyna jasandy ıntellekt jaýap beredi.
