Telegram resmı Astana Hub qatysýshysy atandy

ASTANA. KAZINFORM — Telegram Ortalyq Azııadaǵy jetekshi ınnovatsııalyq klasteri Astana Hub-tyń qatysýshysy mártebesin aldy. Bul týraly habtyń resmı saıtynda jarııalandy.

Telegram — derekter qaýipsizdigi, turaqtylyq, jyldamdyq pen aýqymdylyqqa basymdyq beretin táýelsiz tehnologııalyq platforma. Búginde ol álem boıynsha eń kóp júkteletin bes qosymshanyń qatarynda. Aı saıyn platformaǵa bir mıllıardtan astam belsendi qoldanýshy kiredi.

— Telegram ishindegi Mini Apps veb-qosymshalary arqyly túrli servıs, marketpleıster men oıyndar qurýǵa bolady. Bul quraldar aı saıyn 500 mıllıonnan astam qoldanýshyny tartady. 2024 jyly kompanııa ishki valıýta — Telegram Stars-ty iske qosty. Qosymsha ázirleýshileri bul valıýtany Toncoin-ge aıyrbastaı alady. Platforma tsıfrlyq qaýipsizdik qaǵıdattaryna adal, ıaǵnı tirkelý kezinde jeke derek talap etilmeıdi, bastapqy kody ashyq, al shıfrlaý hattamasy aýdıtke qoljetimdi, — delingen habarlamada.

Sondaı-aq Astana Hub ekojúıege qosylý arqyly Telegram úshin birlesken jobalardy iske asyrýǵa, tájirıbe almasýǵa jáne ishki ári jahandyq naryqqa arnalǵan tsıfrlyq ónimderdi damytýdyń jańa múmkindigin usynyp otyr. 

Eske salaıyq, ótken jyly Telegram-nyń Qazaqstanǵa jaýapty keńsesi Astanada ashylatyny aıtyldy. 

Sondaı-aq Qazaqstanda ashylatyn Telegram keńsesinde otandyq mamandarǵa basymdyq beriletini belgili bolǵan edi.