Telegram Pavel Dýrovtyń ustalýyna baılanysty málimdeme jasady

ASTANA. KAZINFORM — Telegram messenjeriniń resmı akkaýnty kompanııanyń negizin qalaýshy Pavel Dýrovtyń Frantsııada ustalýyna qatysty alǵash ret túsinikteme berdi. 

«Telegram Eýropa Odaǵynyń zańdaryn, sonyń ishinde Tsıfrlyq qyzmetter týraly zańdy qatań saqtaıdy — onyń moderatsııasy salalyq standarttarǵa sáıkes keledi jáne únemi jetildirilip otyrady. Telegram basshysy Pavel Dýrovtyń elden jasyratyn eshteńesi joq jáne ol Eýropada jıi saıahattaıdy. Platformany teris maqsatta paıdalanǵandar úshin osy jeli nemese onyń ıesi jaýapty deý — absýrd», - delingen resmı paraqshada. 

Kompanııa málimetinshe, dúnıe júzinde mıllıardqa jýyq qoldanýshy Telegram-dy baılanys quraly jáne ómirlik mańyzdy aqparat kózi retinde paıdalanady.

«Biz bul jaǵdaıdyń tezirek sheshilýin kútemiz. Telegram ózderińizben birge» deıdi kompanııa. 

Frantsııa prokýratýrasy bul is jaıly 26 tamyz, dúısenbi kúni jan-jaqty aqparat beriletinin málimdedi. 

Eske sala keteıik, Reseıden shyqqan mıllıarder, Telegram negizin qalaýshy Pavel Dýrov keshe Parıj mańyndaǵy Le-Býrje áýejaıynda ustaldy. Onyń janynda qurbysy jáne oqqaǵary bolǵan.

Jergilikti telearnanyń málimetinshe, buǵan deıin Dýrov Frantsııada izdeý jarııalanǵan adamdar tiziminde bolǵan.  

Keıbir BAQ taǵylǵan aıyptar boıynsha ol 20 jylǵa deıin sottalýy múmkin degen boljam aıtyp otyr.

Pavel Dýrov — 2021 jyldan beri Frantsııa azamaty. Degenmen sońǵy jyldary negizinen Birikken Arab Ámirlikterinde turyp keldi.