Telegram jeke domendik aımaqqa ıe bolýy múmkin
ASTANA. KAZINFORM — Telegram kompanııasy .gram jeke domendik aımaǵyn tirkeýge ótinim berdi. Eger ótinimdi Halyqaralyq domendik ataýlar men IP-mekenjaılardy basqarý uıymy (ICANN) maquldasa, messendjer qoldanýshylary ekinshi deńgeıli domenderdi tirkep, olardyń negizinde ınteraktıvti saıttar jasaı alady.
Messendjerdiń negizin qalaýshy Pavel Dýrov ótinim berilgenin habarlady. Onyń aıtýynsha, bolashaqta Telegram-nyń shamamen 1 mlrd qoldanýshysy .gram aımaǵynda jeke domen ıelene alady.
Jańa júıe qarapaıym mátindik suraýlar arqyly ınteraktıvti saıttar jasaýǵa da múmkindik beredi. Ol úshin qoldanýshy qalaǵan saıtyn bir ǵana prompt arqyly sıpattasa jetkilikti. Keıin daıyn saıtty platformada ornalastyrýǵa bolady.
ICANN (Internet Corporation for Assigned Names and Numbers) — domendik ataýlar júıesi men ınternettegi mekenjaı keńistigin bólýdi úılestiretin halyqaralyq kommertsııalyq emes uıym.
Buǵan deıin Telegram qosymshadaǵy siltemelerdi qalyptastyrý úshin t.me ornyna telegram.me domenin qoldana bastaǵan edi. Bul rette burynǵy siltemeler de jumysyn jalǵastyra beredi.
Aıta keteıik, osyǵan deıin Reseı Pavel Dýrovqa halyqaralyq izdeý jarııalaǵan bolatyn.
