Telegram-nyń negizin qalaýshy Pavel Dýrov elderdiń Úkimetine qandaı aqparat usynatynyn aıtty
ASTANA. KAZINFORM – Telegram-nyń negizin qalaýshy Pavel Dýrov resmı paraqshasynda messendjer kóptegen eldiń bıligine qylmyskerlerdiń IP-mekenjaılaryn jarııa ete alatynyn túsindirdi.
Onyń atap ótýinshe, Telegram tıisinshe zańdy saýal alǵan kezde qajetti derekterdi únemi usynyp otyrady. Máselen, olar 2024 jyly Brazılııa bıligine 201 zańdy saýal boıynsha málimetterdi berdi. Úndistan kompanııanyń iri naryǵy sanalady. Kompanııa dál osy eldiń bıyl І-toqsanda - 2 461, ІІ-toqsanda - 2 151, al ІІІ-toqsanda 2 380 zańdy saýalyn qanaǵattandyrdy.
Munan bólek, Eýropadan da saýaldar legi arta túsken. Alaıda, Pavel Dýrov olardyń naqty sanyn keltirmeıdi.
«Túsinbestik týyndatpaý úshin biz ótken aptadan ártúrli elder úshin qupııalyq saıasatymyzdy jeńildetip, sáıkestendirdik. Biraq, negizgi ustanymymyz ózgergen joq. Biz barlyq ýaqytta da jergilikti zańdardy eger ol bostandyq pen qupııalyq qundylyqtarymyzǵa qaıshy kelmese saqtaýǵa umtylamyz», - dep atap ótti ol.
Messendjer basshysy Telegram qylmyskerlerdi emes, belsendiler men qarapaıym adamdardy qorǵaý úshin qurylǵan. Pavel Dýrov messendjer qylmyskerlerge platformany teris pıǵylda paıdalanýǵa nemese sot tóreliginen jaltarýǵa múmkindik bermeıtindigine sendiredi.
Telegram 2024 jyldyń ishinde Qazaqstan Úkimeti tarapynan derekterdi usyný týraly birde-bir saýal almaǵan.
Eske sala ketsek, Telegram messenjeriniń negizin qalaýshy Pavel Dýrov Frantsııanyń quqyq qorǵaý organdarymen baılanys ornatyp, Telegram qoldanýshylary týraly jeke basyn anyqtaıtyn aqparatty bere bastady.
Frantsýz aqparat quraldarynyń habarlaýynsha, Pavel Dýrov 24 tamyzda Parıjdiń Le Býrje áýejaıynda balalarǵa qarsy qylmysqa, esirtki saýdasyna jáne alaıaqtyqqa qatysy bar degen aıyppen ustalǵan.
Ilon Mask Dýrovtyń ustalýyn sóz bostandyǵyna kepildik beretin AQSh Konstıtýtsııasyna engizilgen birinshi túzetýdiń «jarnamasy» dep atady.
Al Telegram komandasy platformadaǵy qııanat týraly aıyptaýlardyń aqylǵa qonymsyz ekenin aıtty.
Eýropalyq Politico basylymy Frantsııada Telegram negizin qalaýshy Pavel Dýrovtyń aǵasy Nıkolaı Dýrovqa da izdeý jarııalanǵanyn habarlady.
Sýdıa Telegram-nyń negizin qalaýshy Pavel Dýrovty kepilmen bosatty.
Keıinnen Dýrov Frantsııada ustalýyna qatysty alǵash ret túsinik berdi.
