Telegram-nan tapsyrys túsken: Tarazda esirtki kýreri 10 jylǵa sottaldy

TARAZ. KAZINFORM – Jambyl oblysynyń qylmystyq ister jónindegi mamandandyrylǵan aýdanaralyq sotynda esirtki tasymaldaýmen aınalysqan kýrerge qatysty qylmystyq is qaraldy.

Aıyptalýshy 2023 jyldyń qyrkúıeginde «Telegram» messendjeri arqyly «Ol» degen búrkenshik esimdi azamatpen tanysyp, Tarazdyń aýmaǵynda bir jetkizilim úshin 1 myń teńge alyp, esirtki kýreri retinde jumysqa ornalasqan.

Sottalýshy 2023 jyldyń qyrkúıeginen 2024 jyldyń aqpanyna deıin aldyn ala kórsetilgen geolokatsııalardan psıhotroptyq zattardy jınap, olardy belgili bir dozalarǵa bólip «Zip» paketterine salyp, ótkizip otyrǵan.

«Polıtseıler esirtki jetkizýshini 2024 jyldyń aqpanynda tańerteń kezekti dozany qoıýǵa oqtalǵan ýaqytta ustady. Jeke tintý kezinde odan jalpy salmaǵy 18,73 gramm bolatyn «pırrolıdın» jáne «fenılpentan» tabylyp, tárkilendi.

Sot úkimimen K. Esimdi aıyptalýshy QR Qylmystyq Kodeksiniń 297-baby, 3-bólimi, 1,3,5-tarmaqtary boıynsha kózdelgen qylmys jasaǵany úshin kináli dep tanylyp, oǵan 10 jyl merzimge bas bostandyǵynan aıyrý jazasy taǵaıyndaldy», – delingen sot habarlamasynda.
Úkim zańdy kúshine engen joq.

Buǵan deıin Jambyl oblysynda 5 mıllıard teńgeniń aktsızdik ónimderi tárkilengenin jazǵan bolatynbyz.