Aqparat mınıstrligi Telegram-nyń qylmyskerlerge qatysty derekterdi usynýyn qoldaıdy
ASTANA. KAZINFORM – Endi Telegram búkil álem boıynsha úılesimdilikti qamtamasyz etý úshin qyzmet kórsetý sharttary men erejelerin buzǵandardyń IP mekenjaılary men telefon nómirlerin zańdy talaptarǵa sáıkes tıisti organdar jarııalaýy múmkin. Osyǵan qatysty Mádenıet jáne aqparat vıtse-mınıstri Qanat Ysqaqov pikirin bilgen edik.
«Telegram jelisi basshysynyń aıtýynsha, tek qylmystyq kontentterdi taratýshynyń jeke málimetteri berilýi múmkin. Zańsyz kontentterdiń aldyn alý jáne paıdalanýshylardyń quqyǵyn qorǵaý maqsatynda biz bul jańashyldyqty qoldaımyz. Biz tek Telegram jelisimen ǵana emes, basqa da áleýmettik jeliler basshylyǵymen tyǵyz jumys jasaýdy jalǵastyramyz. Ásirese táýekel týdyratyn balalarǵa qatysty zańsyz kontentterdiń taralýy mańyzdy bolyp otyr», - dedi Qanat Ysqaqov Astana Media Week is-sharasy barysynda BAQ ókilderiniń saýalyna jaýap bere otyryp.
Buǵan deıin habarlaǵanymyzdaı, Telegram paıdalanýshylarynyń telefondary men IP mekenjaılary quqyq qorǵaý organdarynyń resmı ótinishi boıynsha qaýipsizdik qyzmetkerlerine ashylady. Muny kúni keshe messendjerdiń negizin qalaýshy Pavel Dýrov habarlady.
