Telegram Qazaqstandaǵy ókilin taǵaıyndap, keńsesin ashady
ASTANA. KAZINFORM – Telegram Qazaqstandaǵy ókilin taǵaıyndap, keńsesin ashady. Bul týraly Tsıfrlyq damý, ınnovatsııalar jáne aeroǵarysh ónerkásibi mınıstri Jaslan Madıev AQSh Saýda palatasymen jáne Meta men Apple sııaqty iri amerıkalyq kompanııalardyń ókilderimen kezdesýlerinde aıtty.
Kezdesýlerde málimetter qaýipsizdigi, jalǵan akkaýnttarmen kúres jáne paıdalanýshylardy qorǵaýǵa qatysty mańyzdy máseleler talqylandy. Bul taqyryptar qazaqstandyqtardyń tsıfrlyq keńistiktegi qaýipsizdigin qamtamasyz etý úshin erekshe mańyzdy.
«Biz sondaı-aq Telegram platformasymen zańsyz kontentti jedel joıý jáne destrýktıvti arnalardy buǵattaý boıynsha belsendi túrde yntymaqtastyq ornatyp jatyrmyz. Bizdiń zańnamaǵa sáıkes, endi Telegram, WhatsApp jáne TikTok sııaqty ınternet-platformalar Qazaqstanda óz ókilin taǵaıyndaýǵa mindetti. Telegram-men olardyń ókilin taǵaıyndaý jáne keńse ashý týraly kelisimge qol jetkizildi — bul kontentti baqylaýdy arttyrýǵa baǵyttalǵan mańyzdy qadam», — dep atap ótti Jaslan Madıev.
Mınıstrlik sonymen qatar Meta kompanııasymen alaıaqtyq shemalarǵa qarsy kúres jumystaryn bastaýda. Internet alaıaqtyqqa qarsy is-qımyl — ortaq kúsh-jigerdi qajet etetin jahandyq mindet. Meta ókilderi Qazaqstan tap bolyp otyrǵan ınternet alaıaqtyq kóptegen elder úshin ortaq problema ekenin atap ótti. Sońǵy toqsanda Meta jasandy ıntellekt tehnologııalaryn paıdalana otyryp, álem boıynsha 1,2 mıllıard jalǵan akkaýntty buǵattady.
«Tsıfrlyq damý mınıstrligi qazaqstandyqtardyń tsıfrlyq platformalarda qaýipsizdigin qamtamasyz etetin senimdi ınfraqurylymdy qurý úshin halyqaralyq seriktestermen jumysyn jalǵastyrady. Paıdalanýshylardy qorǵaý basty basymdyqtardyń biri bolyp qala beredi, jáne biz osy maqsatqa jetý úshin yntymaqtastyqty nyǵaıtatyn bolamyz», - dep atap ótedi mınıstrlikten.
