Telegram-da jańa mátindik redaktor paıda bolady: Keı múmkindik aqyly bolady
ASTANA. KAZINFORM — Telegram messendjeri jańa mátindik redaktoryn synaqtan ótkizip jatyr. Bul múmkindikti ázirge tek Telegram Premium aqyly jazylymyn paıdalanatyndar ǵana qoldana alady. Bul týraly 24kg habarlady.
Android júıesine arnalǵan Telegram 12.9 beta-nusqasynda habarlamalardy keńeıtilgen formattaýǵa shekteý engizilgeni anyqtaldy. Bul múmkindik tek Telegram Premium jazylymyna ıe paıdalanýshylarǵa qoljetimdi bolady.
Sonymen qatar, keńeıtilgen redaktordyń ózi barlyq qoldanýshylar úshin ashyq kúıinde qalady. Alaıda osy quraldar arqyly rásimdelgen habarlamany jiberýge áreket jasaǵanda, qosymsha aqyly jazylymnyń bar-joǵyn tekseredi.
Jańa redaktor mátindi kádimgi qujatqa uqsas etip rásimdeýge múmkindik beredi. Paıdalanýshylar taqyryptar, dáıeksózder, kod bloktary, tómengi eskertpeler (fýterler), markerlengen jáne nómirlengen tizimder, chek-paraqtar (check-list), sondaı-aq jınalmaly mátin bloktaryn qoldana alady.
Budan bólek, mundaı habarlamalarǵa sýretterdi, aýdıofaıldardy, geolokatsııany qosýǵa jáne Telegram Premium emodzılerin paıdalanýǵa bolady.
Aıta keteıik, keńeıtilgen formattaý júıesi múlde jańa múmkindik emes. Telegram 12.8 nusqasynda kestelerdi, formýlalardy jáne dáıeksózderdi qamtıtyn Markdown belgileý tilin qoldaý engizilgen bolatyn. Alaıda ol kezde bul múmkindik tek bottarǵa ǵana qoljetimdi edi.
Buǵan deıin júrgizýshilerge arnalǵan telegram-bot iske qosylǵanyn jazdyq.
