Telegram-da qazaqstandyqtardyń jeke derekteri taraǵany ras pa — mınıstrlik jaýaby
ASTANA. KAZINFORM — Májilis depýtaty Murat Ábenov áleýmettik jelidegi paraqshasynda Telegram-da qazaqstandyqtardyń jeke derekteri taralyp jatqanyn jazyp, dabyl qaqty.
— Bot kez kelgen adamǵa Qazaqstan azamattary týraly barlyq jeke derekti tegin taratyp otyr. Bul jobany, boljam boıynsha, Reseı Federatsııasynan basqaryp otyr, sebebi ol jerde reseılik azamattar týraly málimetter kóbirek qamtylǵan. Ashyq qoljetimdilikte memlekettik aqparattyq júıelerden alynǵan derekter bar, eń yqtımal nusqa — e-gov portalynan júktelgen baza. Bul málimetter naqty ýaqyt rejıminde jańartylyp otyrady, mysaly, týǵan kúni, JSN, turǵylyqty mekenjaıy, telefon nómirleri, sondaı-aq otbasy músheleri týraly aqparat kórsetiledi. Sonymen qatar azamattyń qandaı páter satyp alǵany, qandaı avtokólik mingeni jaıly málimetter de bar, — dep jazdy Murat Ábenov Facebook paraqshasynda.
Osy oraıda halyq qalaýlysy atalǵan problemaǵa qatysty Іshki ister mınıstrligi men Bas Prokýratýradan shuǵyl shara qabyldaý qajettigin surady.
Іstiń mán-jaıyn Tsıfrlyq damý, ınnovatsııalar jáne aeroǵarysh ónerkásibi mınıstrliginen suraǵan edik.
— Telegram-bottarǵa júrgizilgen taldaý nátıjesinde azamattardyń jeke derekteri buryn taralǵan aqparat kózderinen, ashyq derekkózderden jáne GetContact sekildi basqa da taraptan alynatyny anyqtaldy. Aıta ketý kerek, GetContact qyzmetine Qazaqstan Respýblıkasy aýmaǵynan qoljetimdilik shektelgen, sebebi bul servıs Qazaqstan Respýblıkasynyń zańnamasyn buzǵan, — dep jaýap berdi mınıstrlikten agenttik tilshisine.
Aqparatta aıtylǵandaı, qazir atalǵan resýrstarǵa siltemeler ýákiletti organdarǵa tekserý júrgizip, tıisti shara qabyldaý úshin joldandy. Buǵan deıin osy sekildi 30-dan astam bot jumysy toqtatylǵan.
— Azamattardy atalǵan servısterdi paıdalanbaýǵa jáne jeke derekterin ashyq túrde taratpaýǵa shaqyramyz. Eger mundaı jaǵdaılardy anyqtasańyzdar, kib@mdai.gov.kz elektrondyq poshtasyna nemese 8 (7172) 649-405 qyzmettik nómirine habarlasyńyzdar, — deıdi vedomstvodan.
Mınıstrlik quqyq qorǵaý organdarymen birlese otyryp, azamattardyń tsıfrlyq qaýipsizdigi men jeke derekterin qorǵaý baǵytyndaǵy jumysyn jalǵastyrady.
Aıta keteıik, qazaqstandyqtar jeke derekteri taratylsa, ótemaqy ala alady.
Eske salsaq, elimizde jeke derekter jınaıtyn kompanııalardan kıbersaqtandyrý talap etiletini týraly jazǵan edik.