Telegram-da balalardyń quqyǵyn qorǵaıtyn chat-kanal ashyldy

NUR-SULTAN. QazAqparat - QR Bilim jáne ǵylym mınıstrliginiń Bala quqyqtaryn qorǵaý komıteti kámeletke tolmaǵandarǵa qatysty quqyq buzýshylyq, zorlyq-zombylyq, sondaı-aq pedagogtardyń ádepke jatpaıtyn minez-qulyq faktileri týraly habarlamalardy anyqtaý maqsatynda Telegram messenjerinde Bala QORGAÝ chat-kanalyn ashty, dep habarlaıdy QazAqparat mınıstrliktiń baspasóz qyzmetine silteme jasap.

«Eger Sizge joǵaryda kórsetilgen faktiler týraly belgili bolsa, oblys, aýdan, aýyl, bilim berý uıymynyń ataýy kórsete otyryp, atalǵan chatqa aqparatty jiberýge bolady. Atalǵan siltemeler Bala quqyqtaryn qorǵaý komıteti tarapynan shuǵyl sharalar qabyldaý úshin quzyretti organdarǵa joldanady» delingen habarlamada.

Chat-kanalǵa qosylý úshin Telegram qosymshasynan «bala_qorgau» dep izdep, arnaǵa jazylýǵa bolady.