Telegram bir táýlikte 200 myńnan astam kúmándi top pen kanaldardy buǵattady
ASTANA. KAZINFORM – Telegram jelisiniń moderatorlary 234 945 top pen kanaldy buǵattady. Bul týraly messendjerdiń moderatsııa derekteri kórsetip otyr, dep jazdy 24 kg.
Jańa buǵattaýlardyń deńgeıi 23 qańtardaǵy rekordty kórsetkishten de asyp túsken. Sol kúni moderatorlar 300 840 resýrsqa tyıym salǵan.
Jyl basynan beri Telegram 7,2 mıllıonnan astam top pen kanaldy buǵattaǵan.
2025 jyldyń jeltoqsan aıynyń basyna qaraı messendjer shamamen 40 mıllıon top pen kanalǵa tyıym salǵan, olardyń 894 324-i balalarǵa zorlyq kórsetý materıaldaryn qamtyǵan.
Telegram 2015 jyldan bastap moderatsııa júıesine paıdalanýshylardan túsken shaǵymdar men mashınalyq oqytý negizindegi «proaktıvti baqylaý» kiretinin, al 2024 jyldyń basynan bastap osy sharalarǵa jasandy ıntellekt quraldary da qosylǵanyn atap ótti.
Buǵan deıin Telegram-da paıdalanýshylardyń jasyn tekserýge arnalǵan resmı bot iske qosylǵanyn jazǵan edik.