Telegram-bot arqyly áleýmettik tólemaqy alýǵa 800 myńnan astam ótinish berildi

NUR-SULTAN. QazAqparat - QR Tsıfrlyq damý, ınnovatsııalar jáne aeroǵarysh ónerkásibi mınıstrliginiń Telegram-boty arqyly áleýmettik tólemaqy alýǵa 800 myńnan astam ótinish berildi. Bul jaıynda atalǵan mınıstrliktiń baspasóz qyzmetinen málim etti, dep habarlaıdy QazAqparat tilshisi.

«Mınıstrlik 6 sáýirde iske qosqan Telegram-bottardyń kómegimen 42 500 tg áleýmettik tólemdi alýǵa 800 154 ótinish berildi. Jalpy alǵanda, barlyq qoljetimdi servıster arqyly azamattardan 2,5 mln ótinish kelip túsken», - delingen vedomstvo aqparatynda.

Aıta keteıik, QR Tsıfrlyq damý, ınnovatsııalar jáne aeroǵarysh ónerkásibi mınıstrligi 42500 teńge áleýmettik tólemin alýǵa ótinim berýge arnalǵan qosymsha arnalardy iske qosqan bolatyn. Ár óńirdiń azamattary óz óńirleri boıynsha ótinim bere alatyn 18 telegram bot quryldy. Bul arnalardyń júktemesin azaıtyp, ótinim berý ýaqytyn qysqartýǵa múmkindik berdi.

Sondaı-aq, egov.kz portalynda ETsQ-ny paıdalanbaı, SMS arqyly avtorlaný jolymen ótinim berýge bolady. Bergen ótinimińizdiń qaralǵanyn jáne óńdelgenin portaldaǵy jeke kabınetten teksere alasyz. Budan basqa, 42500.enbek.kz servısi arqyly da ótinim qabyldaý jalǵasýda.