Telegram bılikke qylmyskerlerdiń derekterin berip otyrady — Pavel Dýrov
ASTANA. KAZINFORM — Telegram negizin qalaýshy Pavel Dýrovtyń málimdeýinshe, messendjer tıisti organdardyń oryndy suraýy boıynsha paıdalanýshylardyń IP mekenjaıy men telefon nómirlerin usyna alady. Ol bul shara Telegram erejesin buzýshylarǵa qatysty ekenin jáne qylmyskerlerdi messendjerde ishki izdeýdi teris paıdalanýdan tyıý úshin engizilip jatqanyn túsindirdi, dep habarlaıdy TASS aqparat agenttigi.
«Biz erejemizdi buzǵandardyń IP-mekenjaıy men telefon nómiri zańdy talaptarǵa sáıkes tıisti organdarǵa berilýi múmkin ekenin túsindirdik», — dep jazady Dýrov óziniń Telegram arnasynda.
Ol messendjerdiń qyzmet kórsetý sharttary men qupııalylyq saıasatyn birkelkilikke jetkizip, jańartqanyn naqtylady.
Sondaı-aq ol keıbir qoldanýshylardyń zańsyz taýarlardy satý úshin Telegram-nyń izdeý fýnktsııasyn teris paıdalanyp jatqanyna nazar aýdartty.
Komanda sońǵy aptalarda búkil problemalyq kontentti izdeýden alyp tastady.
«Sońǵy birneshe aptada arnaıy bir top moderator jasandy ıntellekt kómegimen Telegram-da izdeý júıesin áldeqaıda qaýipsiz etti. Іzdeý barysynda biz anyqtaǵan barsha problemaly materıaldar endi joq», — dep qosty Dýrov.
Ol sondaı-aq paıdalanýshylardy zańsyz kontent týraly habarlaýǵa shaqyrdy.
Eske sala ketsek, Telegram messenjeriniń negizin qalaýshy Pavel Dýrov Frantsııanyń quqyq qorǵaý organdarymen baılanys ornatyp, Telegram qoldanýshylary týraly jeke basyn anyqtaıtyn aqparatty bere bastady.
Frantsýz aqparat quraldarynyń habarlaýynsha, Pavel Dýrov 24 tamyzda Parıjdiń Le Býrje áýejaıynda balalarǵa qarsy qylmysqa, esirtki saýdasyna jáne alaıaqtyqqa qatysy bar degen aıyppen ustalǵan.
Ilon Mask Dýrovtyń ustalýyn sóz bostandyǵyna kepildik beretin AQSh Konstıtýtsııasyna engizilgen birinshi túzetýdiń «jarnamasy» dep atady.
Al Telegram komandasy platformadaǵy qııanat týraly aıyptaýlardyń aqylǵa qonymsyz ekenin aıtty.
Eýropalyq Politico basylymy Frantsııada Telegram negizin qalaýshy Pavel Dýrovtyń aǵasy Nıkolaı Dýrovqa da izdeý jarııalanǵanyn habarlady.
Sýdıa Telegram-nyń negizin qalaýshy Pavel Dýrovty kepilmen bosatty.
Keıinnen Dýrov Frantsııada ustalýyna qatysty alǵash ret túsinik berdi.
