Telegram alǵash ret 540 mıllıon dollar paıdaǵa keneldi
ASTANA. KAZINFORM — 2024 jyldyń qorytyndysy boıynsha Telegram messendjeri alǵash ret paıdaǵa shyqty — kompanııa 540 mıllıon dollar tabys tapqan. Bul týraly Bul jóninde Delo.ua saıty Financial Times basylymyna silteme jasap habarlaıdy.
Bul qarjylyq jetistikke Telegram frantsýz bıligi tarapynan onyń negizin qalaýshyǵa baǵyttalǵan sot qysymdary aıasynda jáne seriktestik jobalar men krıptoekojúıeden túsken tabystyń kúrt ósýi nátıjesinde qol jetkizdi.
Financial Times-tyń qolyna túsken ishki prezentatsııaǵa sáıkes, 2024 jyly Telegram-nyń kirisi 1,4 mıllıard dollarǵa jetip, ótken jylmen salystyrǵanda (343 mln dollar) tórt ese artqan. Al 2023 jyly kompanııa 173 mıllıon dollar shyǵynǵa batqan bolatyn.
Bul qarjylyq kórsetkishter ınvestorlarǵa jańa 1,5 mıllıard dollar kólemindegi oblıgatsııalar shyǵarýdyń aldynda tanystyrylǵan. Qaryz satý naýqany seısenbi kúni bastaldy jáne aldaǵy kúnderi aıaqtalýy múmkin.
Aqparat kózderiniń aıtýynsha, Telegram tabysyn negizinen tólem jasaýǵa qabiletti qoldanýshylar sanynyń artýy, premıým jazylymdar jáne Ton blokcheıni men Toncoin krıptovalıýtasymen baılanysty ekojúıeniń damýy qamtamasyz etip otyr. Platforma úshinshi tarap ázirleýshilerine saýda, oıyndar jáne túrli qyzmet salalary boıynsha shaǵyn qosymshalar jasaýǵa múmkindik berip, odan qosymsha tabys taýyp otyr.
2024 jyly kompanııa tómendegideı tabys kózderinen qarjy alǵan:
• Jarnamadan — 250 mln dollar;
• Premıým jazylymdardan — 292 mln dollar;
• Jalpy tabystyń jartysyna jýyǵy — Ton ekojúıesi men seriktestikterden.
Telegram 2025 jyly tabysyn 2 mıllıard dollarǵa deıin ulǵaıtýdy, al paıdasyn 720 mıllıon dollarǵa jetkizýdi josparlap otyr. 2025 jylǵy aqpan aıyndaǵy jaǵdaı boıynsha messendjerdiń qolma-qol qory 530 mıllıon dollardy quraǵan (krıptoaktıvter esepke alynbaǵan).
Sonymen qatar kompanııa IPO (qoǵamdyq aktsııalar satý) múmkindigin de qarastyryp otyr. Alaıda Telegram men onyń basshylyǵyna qatysty Frantsııadaǵy tergeý bul josparǵa kedergi keltirýi múmkin. Frantsııa men BAÁ azamattyǵy bar Pavel Dýrov platformadaǵy keıbir kontent — tyıym salynǵan materıaldar men terrorızmge baılanysty aqparat — úshin qysymǵa ushyrap otyr.
Dýrovtyń ózi frantsýz bıliginiń áreketteriniń saıası astary bar ekenin aıtty. Ol Frantsııanyń barlaý qyzmetin Rýmynııadaǵy saılaý aldynda saıası kontentke áser etýge tyrysty dep aıyptap, ásirese konservatıvtik pikirlerge shekteý qoıý talabyn atady.
Zańdyq táýekelderge qaramastan, Telegram jasandy ıntellekt salasyndaǵy seriktestikterin keńeıtip keledi. Kompanııa Ilon Masktyń xAI startapyna tıesili Grok atty chat-botpen ıntegratsııany jáne ony monetızatsııalaý josparlaryn jarııa etti.
Qazirgi tańda Telegram-da aı saıyn 1 mıllıardtan astam belsendi qoldanýshy bar. Messendjer nebary 60 qyzmetkerden turatyn shaǵyn komandamen basqarylyp, moderatsııa qyzmetteri kóbine aýtsorsıng arqyly júzege asyrylady.
Eske sala keteıik, Frantsııa prokýratýrasy Dýrovqa AQSh-qa barýǵa ruqsat bermegenin jazǵan bolatynbyz.
Onyń aldynda Dýrov «Telegram Eýropalyq Odaq zańyn buzdy deý— ádiletsizdik» dep dabyl qaqqan bolatyn.