Telefonnan kóz almaıtyndarǵa jeke júrginshi jolaǵyn syzyp berdi
ASTANA. QazAqparat - Taıland astanasynda oqyp jatqan stýdentter osy kezge deıin bas aýyrtqan máselege sheshim tapty, dep jazady 24.kz.
Olar kóshede kele jatyp, únemi qalta telefonyna shuqshııatyn júrginshilerge arnap jol bólý ıdeıasyn iske asyrdy. Bul úshin tapqyr stýdentter ýnıversıtet janynan ótetin júrginshi jolynyń qaq ortasyn aq jolaqpen anyq etip syzǵan. Munan soń joldyń bir bóligine telefonnyń sýretin salǵan. Al ekinshi bólikte belinen bir syzylǵan telefonnyń sýreti bar.
Ideıa avtorlarynyń aıtýynsha, budan keıin jaǵdaı biraz ózgeripti. Sebebi buryn gadjetke ǵana qarap kele jatqan adam únemi ózge júrginshimen soqtyǵysyp qalatyn. Eń soraqysy, telefonnyń «ishinde ómir súretinder» kólik júretin jolǵa qalaı shyǵyp ketkenin bilmeı qalyp, apatqa ushyraǵan kezder de bolǵan. Endi kóshede kele jatqan jurt joldaǵy arnaıy belgige qaraı júrip, dittegen jerlerine kedergisiz, al eń bastysy, aman-saý jetedi, dep habarlaıdy TASS.
Foto:http://news.thaivisa.com/
