Telefonmen sóılesken 9 avtobýs júrgizýshisi jazalandy
QOSTANAI. QazAqparat - Qostanaı oblysynda qoǵamdyq kólik basqaryp, uıaly telefon paıdalanatyn júrgizýshiler kóbeıgen. Bul týraly jergilikti polıtsııa qyzmetiniń (JPQ) bólim bastyǵy Aıgúl Bekmaǵambetova aıtty, dep habarlaıdy QazAqparat.
Oblystyq ІІD jergilikti polıtsııa qyzmetiniń mamandary osy aptada «Avtobýs» profılaktıkalyq is-sharasyn ótkizdi. Maqsaty - qoǵamdyq kólikterdegi quqyqbuzýshylyqtardy anyqtaý. JPQ bólim bastyǵy Aıgúl Bekmaǵambetovanyń sózinshe, qozǵalys kezinde telefonmen sóılesetin avtobýs júrgizýshileri kóbeıgen.
«Búginge deıin oblys aýmaǵynda 231 jol qozǵalysy erejeleriniń buzylý faktileri tirkeldi. Tekserý barysynda bir avtobýs júrgizýshisiniń medıtsınalyq tekserýden ótpegeni anyqtaldy. Sondaı-aq, ol kóligin tehnıkalyq qaraý ortalyǵynan ótkizbegen. 9 qoǵamdyq kóliktiń júrgizýshisi uıaly telefonmen sóıleskeni úshin jazalandy. Taǵy 11 avtobýstyń júrgizýshisi qala ishinde jyldamdyqty asyrǵan. Bul kórsetkish ótken aılarmen salystyrǵanda edáýir artqan», - dedi Aıgúl Bekmaǵambetova.
Aıta keteıik, avtobýs parkterinde qaýipsizdik keńesteri qurylýda. Onda talapty elemegen júrgizýshilerge qatysty tártiptik jaza qoldanylady.
