Telefonmen aqsha talap etetin alaıaqtarǵa aldanbas úshin ne isteý kerek

ALMATY. QazAqparat - Polıtsııadan laıfhak: Tártip saqshylary alaıaqtarǵa aldanbas úshin qandaı saqtyq sharalaryn jasaý kerektigin aıtyp berdi, dep habarlaıdy QazAqparat Almaty qalalyq polıtsııa departamentiniń baspasóz qyzmetine silteme jasap.

Ádette telefonmen habarlasyp, shuǵyl aqsha aýdarý kerektigin aıtyp, sol arqyly qomaqty aqshany jymqyryp ketetin alaıaqtyqtyń túri bar. Olar telefon arqyly sóıleskende áldebir týysyńyzdyń atyn aıtyp, qylmys jasaǵany úshin polıtsııa qyzmetkerleri ustap alǵanyn jetkizedi (JKO, esirtki saqtaý, dene jaraqaty). Sodan keıin polıtsııa qyzmetkeri áńgimege aralasady. Ol belgili bir aqsha somasyn alyp kelgen jaǵdaıda týysyńyzdy bosatyp, barlyq máseleni sheshetinin aıtady. «Aqshany kez kelgen telefon nómirine nemese elektrondy ámııanǵa aýdarý kerek» dep aldaıdy olar. Ondaı kezde ne isteý kerek?

Polıtseılerdiń aıtýynsha, jaqyn týysyńyz nemese dosyńyz belgisiz nómir arqyly habarlasqanda mynadaı qaýipsizdik sharalaryn qoldanǵan jón:

- týysyńyz bolyp habarlasqan adamǵa ekeýińiz de jaýabyn biletin suraqty qoıyńyz;

- quqyq qorǵaý organynyń qyzmetkerinen týysyńyzdy qaı basqarmaǵa nemese bólimge alyp kelgenin surańyz;

- 02 nómirin terińiz jáne PB nemese PB kezekshi bóliminiń nómirin bilip alyp, týysyńyz sonda kelip túsken-túspegenin jáne bul ispen kim aınalysatynyn kezekshiden surap alyńyz;

- eger qońyraý shalǵan týysyńyzdan nemese aıtylǵan faktilerden kúdiktenseńiz, týysyńyzdyń uıaly telefon nómirine qaıta habarlasyp kórińiz. Eger ol óshirýli bolsa, qosymsha aqparat alý úshin onyń dostary men áriptesterine habarlasyńyz.